《天能》上映，我諗好耐都無出現過咁多新奇嘅情況：
1. 有幾可當你未入場睇套戲時，啲人經已叫你有心理準備要睇第二次？
2. 有人因為睇唔明套戲而狂鬧故弄玄虛，呢樣並唔出奇；但狂讚套戲嘅人，同樣係睇唔明套戲，呢樣就非常神奇
3. 因為天能要睇唔止一次先明，所以未睇套戲嘅唔想比睇咗嘅人劇透，而睇咗一次嘅人，又唔想比睇咗超過一次嘅人劇透……
先從結論講起。我係屬於覺得好睇果邊嘅支持者，而且唔單止好睇，仲要認為《天能》將會響科幻電影史上留名，成就甚至超越《Inception》，原因有兩個：一係佢真係超越倒《Inception》，無論響視覺效果定係故事體驗上面，都帶倒比我新驚喜；二係因為佢繼《Inception》之後，再一次令我雖然睇唔明佢啲科幻設定，但仍然覺得非常精彩。
其實有人覺得《天能》係故弄玄虛，有人覺得顯淺易明，係好視乎你點樣看待「劇情」同「科幻設定」兩樣嘢應唔應該撈埋一齊講：剩係講劇情，《天能》故仔當然係非常簡單，不過係講一個設定無頭無尾嘅間諜，接受拯救世界任務嘅經過。即使你完全唔深究套戲入面時刻提住嘅「時空逆轉／逆熵」，你仍然能夠睇得明究竟壞人想點樣毀滅世界，主角幾時遇到危機，最後究竟點樣拯救倒世界──問題係如果你剩係挑開呢樣嘢去睇的話，當然就會覺得有啲乏味。
但《天能》最吸引嘅地方卻係在於一個複雜到睇唔明嘅科幻設定──即係時間逆轉呢樣嘢響好多科幻電影都睇倒，但直頭用Rewind方式演繹出黎，而且仲要咁流暢將順走同逆行兩個時間並存響同一個銀幕上面、仲要係極度激烈嘅戰爭同動作場面，呢個就真係開創先河。
老實講我悟性有限，除咗大概知道啲人入咗時間逆轉機後可以以Rewind方式回到過去，基本上絕大多數地方都唔撚明：例如點解男主角幾次堅持回到過去，結果卻反而益咗奸角？點解要咁驚啲子彈窿？點解女主角要入去架時光機去番機場先救得番條命？最尾一幕究竟Blue Team Red Team時空夾擊搞緊乜？大概「黑人問號」係最符合我當時嘅心情。
Christopher Nolan之所以作為大師，就係響你完全唔明佢個複雜設定嘅同時，仍然可以享受佢為你帶黎嘅觀能刺激同思想衝擊；就好似當日睇《Inception》入到唔知第幾層夢之後，其實我已有啲亂但仍然覺得非常精彩，只不過《天能》係要比前者再複雜幾倍，而仍然順利達到同樣效果而已。
好多人都套用電影入面句對白：「不要嘗試去理解，而是要去感受它」為《電影》作註腳，然而要做到呢一步，談何容易？
不過由於「時空逆轉」實在太勁，反而令佢就住時間線嘅設定有啲犯駁。作為一套時空旅行嘅作品，你係好難逃避要從「祖父悖論」中二擇其一：一係就因為你改變過去連未來都改變埋（亦即殺咗祖父後你自己跟住消失）；一係就未來係不能改變嘅，所有發生嘅嘢早已「命中注定」（你殺祖父嘅行為已係歷史一部份，所以唔會殺得到）。
Christopher Nolan為免作品落入俗套，索性將呢個爭議變成成套電影嘅懸疑點：未來人同奸角認為毀滅過去等如毀滅未來，但響主角不停搶救世界嘅過程中，「命定論」卻係愈來愈明顯──於是主角都開始質疑，如果所有嘢都已係命運注定，咁仲有無必要走去犧牲呢？會唔會世界響呢一刻無毀滅到，就證實咗放棄拯救世界都唔怕？
最終Nolan比主角嘅答案係：「What's done is done」，為咗唔好擾亂宇宙嘅秩序，都係老老實實跟番本意去做──即係明知有啲決定等同送死。老實講我並唔係好滿意呢個答案，因為「命定論」正正係你點努力都無辦法違背歷史發展，而唔應該係靠你努力定做到嘅；結果《天能》結局，亦不過將《12 Monkeys》改成Happy Ending而已。
電影去到呢度完咗，但對於時間設定卻仲有兩個問題：首先係「越南時光」入面，有一個版本係奸角未死（所以劇情先會一路推進），另一個版本卻係奸角死咗，如果係咁即係應該創做咗一個平行宇宙啦係咪？如果係咁咪即係全面成套「祖父悖論」推翻？
第二個問題係，男主角去到最後一刻同個印度婆對峙果陣提到，其實佢自己根本唔需要聽印度婆指揮，因為佢自己就係成件事嘅總指揮，反而印度婆先指係被未來嘅佢指揮。如果我無理解錯的話，咁即係男主角響未來成為咗「守護天能領袖」，然後再安排所有人回到過去拯救世界：咁究竟回到過去歌劇院恐襲個Loop點係邊個定的？唔通係上帝？
點解佢Best Friend唔駛戴氧氣罩？（已解答，因為變番順行就唔駛戴）
Anyway，我都要再次強調，我都只係睇咗一次《天能》，亦特登唔睇網上任何解說避免影響翻睇興緻；所以可能網上已有齊哂解說都唔定，所以我都幾大機會睇多一次然後連埋剩番未寫嘅感想放響下一篇文度。
最後用一件逸事作結：好耐之前上王建元教授嘅科幻小說堂，曾經講過一個經歷：話說當年佢睇完阿諾舒華辛力加嘅《Total Recall》（港譯：《宇宙威龍》）之後，響散場後聽倒有兩個年輕人好興奮咁講「拿睇戲咪就係要睇呢啲場面囉！」──自此之後，佢就用黎做科幻電影嘅殿堂分界線。
