當我見到自己分身出現後,加上阿康事件,我開始控制唔到自己情緒,內心嘅不安感同恐懼不斷湧現,我於是同老闆請咗一星期大假,想好好攪清楚究竟發生咩事。
但似乎我呢種擔憂得唔到老婆體諒。
「你做咩無啦啦請咁多日假?我地唔係夾好咗之後一齊放假去旅行咩?」同老婆食食下飯,知道我突然拎咗咁多假感到好不滿。
「你聽我講,我真係比你講中,我真係惹咗啲事返嚟。」我嘗試解釋。
「比我講中?我講過咩?」老婆一臉不屑嘅眼神望住我。
「結婚一週年𠴱晚,我同你講過話阿康見到自己嘅分身,之後你叫我唔好理……但係呢家……唔到我唔理,因為我都見到自己分身!」
「你又提阿康,我咪同你講過我唔知邊個係阿康呀,𠴱晚食飯我都無聽過你講咩分身,但呢家我話比你聽,如果你無特別事去做,最好聽日返去取消返啲大假,我地明明約好咗!係約定!我唔知你點解可以突然拎假而無問過我囉!」老婆似乎唔係好在意阿康同分身事件,佢在意嘅……只係我啲假期。
「你根本就唔明我講咩……總之我覺得有需要請假,啲假期係我,我鐘意點用就點用。」我低頭繼續食飯堅決地說,我亦都知道我語氣帶住情緒,講呢句說話等同於同老婆反面。
老婆聽後,飯都唔食,一言不發咁走入房,並大大力關門,一切都如我所料。
大廳內只有我一個人在煩惱,面對住眼前嘅飯菜,我都無哂胃口了。
第二朝早起身,發覺床邊老婆已經返咗工,一個人突然請假,實在無任何計劃準備點樣過呢段日子。
打開whatsapp,臉色沉一沉,原來老婆Send咗個Message比我話去娘家住一排先,專登講明「等你放完大假先返」,我放低電話頓時感到無奈,本身關係好地地,如今突如其來發生呢啲事,令到我同老婆關係變差,都唔知為咗咩。
呢段放假日子我無出過街,一直留喺屋企,一方面我唔想出去撞到分身,希望件事過咗一排會自然消失,另一方面我一直搵出阿康消失嘅事,亦搵咗我最好朋友Eric幫手,因為佢不嬲都好聰明,亦都係一個科幻小說作家,都想佢比下意見我。
我將成個經歷講哂比Eric聽,雖然佢都識得阿康,但佢都零印象。不過佢仍然相信我,仲好興奮咁話呢個係一個唔錯嘅題材,絕對要讓比佢寫。
「假設阿康真係生活咗廿幾年,製造咗好多回憶比我地,但突然之間,所有人都唔識得佢,佢存在嘅證據亦都消失埋,咁……係一個集體失憶事件嚟喎?但問題係,點解得你記得阿康,照道理你應該都唔會記得佢架!」Eric問。
「我都唔知,我只係知道喺大家唔記得佢之前,我見過阿康,而阿康同我講見到分身,同埋佢會死……」
「咁即係話,阿康識得嘅人,最後接觸𠴱個人就係你,亦都只有你對佢仲有記憶,可能呢個就係其中一條Rule。」
「咁我可以點?阿康究竟去咗邊?」
「咁真係唔知,可能佢仍然存在,但唔可以搵我地,亦都可能已經比人殺咗,比人埋屍都唔定。你估年年咁多人失蹤,真係有幾多人比你搵得返佢地條屍?話唔埋十年八年後就會喺某個地方搵到佢條屍。」
「咁我呢?我同阿康一樣都見到分身!照你咁講,我係咪都會被失蹤?我會唔會死?」
「冷靜啲!你唔好以為我真係咩都知先得架,我都係估之嘛。總之你呢幾日請咗假就唔好周圍走,可能你自己有幻覺呢,咪當放個假比自己抖下囉。」
我一臉苦惱咁托住個頭,無奈地說:「唉,唯有咁。」
「反正我呢排無嘢做,有咩事實幫你手。」Eric拍一拍我說,聽到呢句說話亦都為我打咗支強心針,總算呢個世界有人明白我。
夜晚,阿媽上嚟探我,我知道佢嚟嘅目的係咩,佢一定知道老婆返咗娘家而擔心我自己一個。
「仔,好地地點解要攪到咁呀?」阿媽苦口婆心咁勸我。雖然我好想將成件事講比佢聽,但我只係得返呢個阿媽,喺我十歲𠴱年阿爸交通意外死咗,之後我同阿媽兩個相依為命,如今佢年紀已經大,我都唔想講呢啲事情令佢更加擔心,因為阿媽係𠴱種少少事都過份擔心嘅人,如果比佢知道我見到分身,佢一定會晚晚瞓唔住。
「我地無嘢呀,過埋聽日我都放完假,到時佢就會返嚟。」不知不覺間我都放咗一星期,呢幾日都一切如常,無咩特別,睇嚟分身呢個問題真係我諗多咗。
「係就最好,結咗婚就要聽哂老婆話,你估好似阿媽我咁下下都就住你鍚哂你咩,你聽日好哄返老婆喇。」說罷,阿媽就放低一堆物資,幫我呢個屋企執頭執尾,雖然每次我都話唔洗執等我地嚟,但佢仍然都會幫我地執屋。
送完阿媽走之後,我都Send咗個whatsapp比老婆,同佢講後日就要返工了,聽晚叫佢返嚟,我會親自下廚煮餐好嘅比佢食,而呢個晚上我仲好興奮咁上網睇Youtube學廚,其實呢種安穩生活都已經好滿足。
直到第二日嘅下午四點鐘,我出咗去街市買咗一堆老婆鐘意食嘅嘢準備返去。去到樓下門口,由於我拎住幾袋餸無手開門,所以示意看更阿叔開門比我。
當個看更阿叔開完見到我時侯,不禁講咗句:「你咁快又出咗去買嘢嘅?」
我笑說:「吓?我岩岩先返嚟喎,係咪認錯人呀?」
「唔係呀,頭先幾分鐘先見你返嚟,我仲同你打聲招呼,不過你望都無望我就走咗,我以為你聽唔到。」
我聽完後個心離咗一離,腦海只係諗到「看更叔叔會唔會見到我個分身?」
我腳步浮浮咁慢慢行去升降機門,然後按制關上。
我吞一吞口水,冷汗都標哂出嚟,如果分身嚟咗,係咪代表我要死,我係咪會比佢殺?點解過咗咁多日都唔肯放過我?
升降機到了我住嘅樓層,我深深吸一口氣,然後冷靜地踏出去,我視線一直望住我門口。
我拎出鎖匙慢慢打開道門,但當我插條鎖匙入去時,發覺門根本無鎖,我隻手一路震,究竟係我出門前唔記得鎖,定係有人嚟過?痴線……我完全記唔到。
我放低手上幾袋嘢,然後慢慢輕步咁踏入屋內,一步一步咁搜索一下。呢個時侯我感受到我嘅心跳快到就快爆炸一樣,每行一步我都感到好用力,亦感受到死亡帶比我嘅恐懼。
我先到廚房一望,再拎咗把刀旁身,然後再慢慢搜索屋內每一個地方。
廚房、大廳、書房、主人房、廁所……都無任何發現,我慢慢坐喺大廳,雖然分身唔喺到,但心跳仍然跳得好快,內心不安感覺我就算點壓抑住都不斷湧出嚟。我望住眼前空無一人嘅屋內,但我完全感受到「對方」存在,佢一定喺我附近,望住我,然後恐怖咁對我笑,一直等緊一個機會殺死我。
夜晚八點,老婆返嚟了。佢見到門開住,兩袋餸放置喺門口,以為有咩事即刻衝入屋睇,點知見到我一個人拎住把刀呆呆坐喺到,燈亦無開,屋內一片黑暗,嚇得老婆大叫。
「你究竟喺到攪咩嘢呀!」老婆開燈大罵。
我回過神,即刻將門關上,然後捉住老婆口震震咁講:「我覺得我會死!我一定好似阿康咁會被消失!」
「你唔好再同我講阿康阿康呀!你醒未呀!從來都無阿康呢個人存在呀!」
「有呀!佢存在呀!全世界得我一個知佢存在呀!Eric話呢個係其中一條Rule!我最後見阿康,所以得我先有佢嘅回憶!」
「你係咪痴咗線呀!工又唔返!呢家好似痴線佬咁拎住把刀喺屋企!你有病係咪要睇下醫生呀!」
「我無病呀!你……你究竟明唔明呀!」對於老婆不理解,我感到非常鼓燥。
「我真係唔明,我亦都無咁好氣對住你。」說罷,老婆就開門離去。
屋內,再一次只有我一個人在煩惱,我放低把刀,慢慢跪喺地下喊起上嚟,我實在好大壓力,我比呢啲事逼到真係抖唔到氣……究竟邊個可以救我?
𠴱晚之後,我無返工,亦都無出過門口,一直持續咗兩星期,而且我已經好多晚都無瞓過覺,因為我覺得每當我閉上眼瞓覺時侯,就係比分身殺我嘅好時機,所以我一直拎住把刀呆呆咁坐。亦都因為咁,我身體差到頭昏腦脹,個人情緒變得好急燥,雙眼通紅,一臉憔悴,就好似一副就死嘅樣咁。
當我喺塊鏡見到自己咁,我又諗起見到分身之後代表離死亡不遠,每當諗起呢樣,我情緒就更崩緊更失控。就好似鏡中嘅自己不斷同我講:「拎把刀斬死自己~斬死自己!」
晚上,老婆終於返嚟,佢一臉關心咁問侯我身體狀況,我實在忍唔住,我真係忍唔住,我喊住口同佢講我真係好驚會死,我真係識得阿康,我真係見到分身……
老婆聽完後態度一反常態,不斷點頭,然後安慰地說:「我信你!聽日我請咗假,我地一齊出去旅行散心好無?」
我聽到老婆咁講,我心中嘅壓力突然掃清一半,呢兩星期生活根本唔係人過,如今有個至親嘅人表示體諒我嘅心情,我真係覺得非常開心。
老婆摸一摸我額頭關心地說:「你睇下你,鬚又唔剃,你呢排身體一定好差,飲杯水先,然後去沖過涼,出嚟就有得食。」老婆比咗杯水我飲。
飲完後,老婆就去咗廚房煮嘢食,而我就喺房到拎衫褲……之後唔知點解突然無任何意識。
「……」
好累。
我好累。
我幾多日無好好咁瞓過覺?
我呢家喺邊?好舒服,好想再繼續瞓落去。
「請問你係咪……家人……佢有冇精神病紀錄?」
好嘈,係邊個講緊嘢?
我慢慢張開雙眼,只見燈光好殘眼,我正想用隻手遮掩一下雙眼時,發現我雙手被綁,連雙腳都綁起,原來我瞓住喺張病床,身旁嘅醫護人員一直推住病床,而我老婆邊走邊望住我。
我望住老婆急問:「呢度邊到嚟?佢地做咩綁住我呀?」
「老公,你有病呀!你病得好嚴重,所以我專登落藥,等你可以嚟呢度醫,我聽人講呢度醫生唔錯架!」老婆哭著說。
「我有咩病?我醫咩呀?我……」我話未說話,我見到自己分身一直企喺遠處望住我恐怖地笑。
我隨即大叫:「放開我呀!個分身喺到呀!放開我呀!」我不斷掙扎,作出激烈抵抗。
老婆再對身旁醫生講:「醫生,佢又講分身,究竟佢點先變返以前咁……?」
醫護人員將我推到一間病房,然後個醫生激動地對住我講:「李生!你冷靜啲先!呢度無人害你!我地只係想幫你ok?」
「唔好再綁我!我無病呀!」我癲咗咁大叫。
「我地可以唔綁你,但你千其唔可以傷害自己同其他人得唔得先?」
「得!得!快啲!放咗我!」說罷,醫護人員真係幫我鬆綁,然後醫生示意我留喺到。接著醫生同護士拉埋老婆埋一邊細聲說,不時望向我。
我隱若聽到醫生對身旁嘅護士講:「同我開支鎮定劑……」
我知道我再咁落去,佢地一定會再整到我瞓著,個分身亦喺出面……佢一定趁呢個機會殺咗我。於是我即刻奪門而出,唔理任何人阻我,我都離開呢度。
各人見到我走,紛紛大叫:「李生!李生!喂!唔好比佢走!」
我不斷推開阻我嘅人,過程之中推倒唔少藥物手推車同病床,場面一度混亂。我沿後樓梯一直落去大堂,當我踏出大門後,我回望一下,再一次人群之中見到自己分身喺遠處一直望住我,我就更加要走。
我望一望附近周圍,原來呢度周圍都係山坡,只有一條馬路落去,我隨時沿住馬路向下跑去。
跑咗大約100米,已經聽到背後充滿車聲同人群雜聲,佢地應該揸車追緊我,再咁落去我遲早都比人捉返。
就係呢個時侯,突然有架車停咗喺我身旁,一望之下,原來係Eric。
「上車喇!仲望!」Eric緊張地說。
我亦隨即上車,Eric亦踩油向下去。
「點解你喺度?」我緊張地問。
「你老婆通知哂成班朋友想嚟探你,話希望對你個病有幫助,我收到呢個訊息就知你老婆實捉你入院。」
「我無病呀!痴線!仲有……我見到自己分身!佢一直喺後面追住我!」我急著對Eric說。
Eric突然停低架車,一臉驚訝地望住前面說:「唔係……佢喺前面。」
我將視線望返前面,只見我分身企喺路中心,充滿殺氣地笑住對住我地。
「你信喇!真係有我嘅分身!」我指住分身大叫。
Eric吞一吞口水,然後說:「咁呢家點算?」
我望一望分身,再望一望Eric,然後捉緊佢手說:「撞埋去!撞死個分身!撞埋去呀!」
Eric望住我驚訝地問:「撞埋去?殺人喎!」
「佢擺明唔係人嚟喇!撞埋去呀!如果見到分身就代表我會死,咁呢家唯有殺咗佢先!」說罷,背後嘅車聲愈嚟愈近。
「屌!死就死!」Eric毫無懸念地踩盡油將架車一直衝前,瞬間將眼前嘅分身撞倒,撞擊一刻,我頓時感到極大衝擊,一下子將我意識打斷,我地一直衝前,不但撞上欄杆,仲一直衝落山坡,穿入樹林……天旋地轉,我亦被彈出車外,一直滾動落去。
然後就暈了。
「……」
「……」
大概唔知暈咗幾耐,我張開雙眼,眼前只一堆樹蔭,將天空遮掩,但隱若可以辨識得到天色應該係黃昏時侯。我慢慢郁動一下手腳,然後慢慢起身,雖然身體唔少地方擦損,但慶幸總算無咩大礙。
我望望周圍,發現自己置身於樹林之中,我慢慢諗返岩岩發生咩事,大概我同Eric連人帶車衝咗落山坡,我頓時醒起Eric,於是企起身周圍搵下佢喺邊,一路行一路都好小心唔好比醫院嘅人發現。
由於樹林嘅樹生得好茂盛,我一時之間都唔知條路點行,但我搵極都搵唔到我地架車,亦唔見有任何撞車痕跡,彷彿好似現場咩都無發生過咁,我一直沿住山坡爬到上馬路,我印像中我地撞車係撞穿欄杆,但如今卻完整無缺。
呆呆咁諗咗陣,我順勢叫停咗架經過嘅的士。
我決定返咗屋企先再作打算。因為如果Eric有咩事,我估班差佬都好快搵上門,不如趁呢段時間返屋企抖下。
我有啲擔心Eric情況,於是拎起手機打比佢。
電話好快接通了,但傳來嘅係一把細路仔嘅聲音。
「喂~邊位搵爸爸?」
我支吾以對咁問:「呀……唔該搵Eric。」
「喂~搵邊個呀~?」突然細路背後有人搶了電話「唔好玩電話,等媽媽聽。」
「喂?搵邊位?」對方嘅媽媽接咗電話。
我再一次問:「我想搵Eric。」
「你打錯喎,無呢個人。」
「哦……唔好意思。」收線後,我一臉黑人問號,明明呢個電話係Eric,點解會有個細路同女人聽?
之後我想打比老婆,打一按電話入面老婆介面時,諗起佢今日捉我去醫院……都係唔好搵佢住,廢事佢又癲起上嚟捉我返去。
不知不覺,的士到咗我屋企樓下。
當我一落車時侯,突然覺得有種違和感覺,發現今晚濃霧特別強,明明夏季而且最近完全無留意到有濃霧出現跡象,感覺整個環境都陰陰沉沉咁。
我行到門口,按了密碼,但門口密碼機一直顯示輸入錯誤。
「明明密碼係721831,做咩係咁錯?又會咁岩今日改咗密碼?」
由於我一直輸入錯誤,看更都忍唔住走過黎幫我開門,然後問:「咩事架?」
我心諗問我咩事?不過我都係第一次見佢,唔識我都唔出奇。我禮貌地指出:「我住9樓E。」說罷,我就急腳行前,個看更都感到奇怪但仍然由我行去。
當我到達9樓E時,我視線見到自己屋企道大門唔同咗嘅?屌,原來我去錯樓層,於是順勢走去後樓梯,但當我行咗幾步路後,我再回頭望一望個樓層,顯示係9樓。
我呆一呆,然後再走返出走廊,的確呢層係9樓,我眼前嘅的確係E室,無行錯呀?做咩有人換咗我道門?
由於連個鎖頭都換咗,所以我唯有按鐘。數秒後,有個阿伯走嚟開門,見到我一臉唔耐煩咁問:「咩事呀?」
「咩事?你邊位呀?做咩喺我屋企呀?」我激動地問,頂佢個肺!霸咗我屋企態度仲咁串?
阿伯見我都起哂鋼,於是同我互罵:「咩你屋企呀!你邊位呀!」
「我……」我視線望一望阿伯背後,發覺屋內嘅裝修同傢私都完全唔同,亦都唔可能一日內容換哂佢,即刻話呢間屋的確唔係我所住嘅屋。
「屌你老味……」說罷,阿伯就大力關上門。
我無奈咁望住道門,然後再望望樓層,究竟發生緊咩事?
當我落返樓下時,個看更再一次用疑惑嘅目光望住我離開。既然唔清楚咩事,唯有去住阿媽屋企先,但銀包岩岩搭完的士都無哂錢,於是走到附近櫃員機㩒錢。
但我入張卡時,隨即彈返出卡出黎,不斷入又不斷彈返出黎。後面排緊隊嘅人開始鼓燥,於是我用手機qr code試下入唔入,但手機顯示戶口名稱和密碼錯誤,攪咩呀?
於是我拎埋其他銀行戶口卡出嚟喺唔同自動櫃員機拎錢都無用,所有卡都無效。
正當我無感到巨大無助時侯,電話響起了。
電話裡出現咗一個陌生嘅電話號碼,我即刻接聽。
「喂?」我問。
「阿哥,阿爸問你幾時返,洗唔洗留定餸比你?」電話裡頭出現一把陌生嘅聲音。
阿哥……?阿爸……?究竟發生咩事?
第二回完1
《待續》
*********************
今次打咗好多字,用咗好多時間 =」
希望大家比like或share或多多留言給予支持
你地既like 就係我寫作動力~大家要瘋狂留言呀~
記得follow ig:https://www.instagram.com/homing0624/
我嘅網店:https://homingming.boutir.com/
買書多多支持我 /。\無書無收入
whatsapp電話號碼無效 在 whatsapp電話號碼無效-在PTT/IG/網紅社群上服務品牌流行穿搭 的推薦與評價
找whatsapp電話號碼無效在Dcard與PTT討論/評價與推薦,提供whatsapp香港辦事處,whatsapp電話,WhatsApp 幫助中心相關資訊,找whatsapp電話號碼無效就在網路品牌潮流服飾 ... ... <看更多>
whatsapp電話號碼無效 在 錯誤- WhatsApp Business 平台- 文件 - Meta for Developers 的推薦與評價
您的電話號碼似乎無效。請仔細檢查,或5 分鐘後再試一次。 輸入不正確的電話 ... ... <看更多>