強貼推介
［我嫁咗畀佢，都可以同你一齊架］知道出處嘅比個叻自己，唔知嘅睇comment張圖。睇埋comment張圖都唔知係乜嘅，你太年輕了
講返楊恭如，呀，孔慈，呀，倫交所。
除咗上一篇文啲基本嘢外（http://bit.ly/32ENlYb），當然亦可以好多政治分析。我特別鍾意吾友Cory嘅一句：估唔到紐倫港發展成咁。真係的，從來冇諗過會係香港同倫敦交易所合併。但，又多得脫歐啦。
講返，今次合併，要過到，除咗啲基本要求（股東舉手，反壟斷）外，仲有樣好有特色嘅條件。如圖
即係點？即係，你飛咗佢，先好同我一齊。唔好諗住做楊恭如，同時同郭富城鄭伊健一齊，亦唔好諗住做楊千嬅，古天樂同吳彥祖爭你。科幻片嚟架！（識揀梗係要高圓圓）
個故事要由早幾個月講起。多得我每日睇Financial Times ，三十蚊份抵睇。我估好多人連Refintiv呢單嘢都唔知
是咁的，港交所同倫交所合併，但要求倫交所啲股東要否決同Refintiv（下稱Ref）本身嘅合併，或者因為其他嘢告吹。總之，有佢就冇我。你當人地之前有婚約，但橫刀奪愛咁。
當然蔣生話齋，做大事嘅，三樣嘢，銀紙銀紙同埋銀紙，誰大誰惡誰正確。況且，Ref又唔係交易所，兩單嘢都唔係完全一樣。你當當初倫交所係想買起Ref多啲。
但我嘅問題係，Why not both？步驚雲聶風（加埋秦霜丫）一齊嚟，或者張申然加埋方啟宏一齊嘛。
先要講前半部嘅故事。Ref係咩公司？都有啲難解。但，就係近年最炙手可熱，街邊阿叔都講嘅FinTech（然後保險有現梳tech地產有扑tech，爭在141未有chic-tech）．
當然Ref是一間很大很大，well established 嘅Fin Tech 公司，唔係香港啲Vanessa手作仔。簡單嚟講，佢原本係路透社（其實係Thompson Reuters）嘅一個部門，Financial & Risk。後來拆出嚟，甚至妹仔大過主人婆。冇上市（應冇？），黑石（BlackStone，唔係BlackRock）55%，Thompson Reuters 45%．
Ref有乜咁巴閉？有咩在手？一樣嘢。Data，你可以當佢係Bloomberg嘅競爭者。另外仲有數據庫，幫你解決呢十年金融業最頭痕嘅問題：反洗錢，KYC（Knock your client）—我點知嚟開戶嗰條托布係咪某西非小國嘅乜乜石油部部長？
咁幾個月（定半年？）前，倫交所係宣佈同Ref 合併-留意，Ref嘅收入同EBITDA（好憎呢個字，自己查）甚至係高過倫交所。所以小象吞大象之類。就當然都係換股。
股東反應唔呃人，宣佈完後，倫交所股價係咁升，升三成咁滯—然後先到港交所嚟接力，或火棒。
故事交代完，我嘅問題就係，Ref好似咁勁，咁做乜唔一齊？三個人的晚餐嘛。
原因，我都唔係好知，經我問專家（即係，whatsapp人）後，以下係可能嘅答案
1：港交所唔想孭債—Ref債務都成120億美金，成千億港紙。倫交所原本孭起埋，咁可能港交所唔想。但，以港倫交所合併後嘅規模，孭呢1000億債，真係有難度？唔好忘記而家債息咁低。倫交所宣佈後股價都係咁升喎，到合併後反而孭唔起？唔似
2：唔想啲貨去外人手。留意，Ref同倫交所又係互相換股。如果佢做完，先同港交所換，即係港交所啲貨可能會不少落咗去BlackRock手上？但，有何問題？反正港交所有高登些牙，冇得狙擊的。所以都唔多似
3：我諗嘅理由，其實未必咁複雜，純粹係唔清唔楚啲合約款條搞唔掂—我並非律師亦唔係做併購，但正路地啲條款一定有包你不能有material change。俗啲講句就係訂咗婚先知你唔係十八歲係三十，仲要啤咗三件，仲要帶埋嚟買一送三，條仔梗係縮沙。企業上嘅，我當我係日本仔最初買譚仔，但你譚仔未完成合併自己去買埋KFC香港，咁又要我食埋啲雞胸佢？我買米線咋喎。
而家一樣啫，我係Ref股東嘅，最初點預你會變咗有港交所份？可能我唔想同佢玩呢，可能我想反價呢，可能我不如飛起你直接同佢呢，太多變數。原本啲terms應該失晒效的
以上全部係門外漢（都話唔係做M&A又唔係做律師）估，睇下有冇高人指點。
留意，寫完先見到，Financial Times嘅報導係：
Hong Kong Exchanges and Clearing has made a £32bn proposal to buy the London Stock Exchange Group, aiming to break up the UK group’s agreed deal for Refinitiv.
唔知聽日香港報紙點寫，但好可能寫好多政治呀，中港呀，中英呀，港英呀。但FT就相當重視港交所要倫交所同Ref分手呢個條件。
不枉我就呢個課題寫多篇文，「真係英雄所見樂瞳」。彭博都講呢樣嘢
初步倫交所嘅官方講法，係仲係想同Ref一齊。但當然都講句要時間評估。即係冇講過，冇嘅，計掂數咯。
似乎未必過到。而如果撻Q啲冷氣軍師又可以話港交所不自量力 條件霸王（升咗成倍仲買要你斷絶個未婚夫都唔得？）之類，當然要加埋李小加嘅大陸仔身份。
又睇下點
