[認真Post] Poly有喪屍
「喪......喪屍啊！」
有一堆人喺Lib把衝咗出嚟，慌失失咁一邊叫一邊跑。後面跟住咗一群成身血，好似喪屍咁樣嘅人，佢哋一路怪叫，一路追住人嚟咬，有人仲畀佢咬到血肉模糊。
「唔好慌，有雨遮喺手嘅人開遮戒備，擋住佢嘅去路！」
廢青不愧係廢青，果然好有經驗！咁啱今朝有啲雨，好多人手上都有把遮，佢哋開咗把遮，你眼望我眼。眼見喪屍們一步步過緊嚟，後面唔知邊個一聲號令：「衝！」
幾個人開住把遮衝咗上前擋住喪屍，喪屍呆一呆，好似蕩失路咁喺度轉，暫緩咗攻勢。
「有鐵尺嘅人，我哋一齊撬啲紅磚出嚟掟Q死佢！」
傻的嗎？鐵尺撬紅磚？邊有咁多人帶鐵尺喺身㗎？
點知真係有一堆人開始摷袋，唔知喺條褲邊度摷咗把鐵尺出嚟，一個二個蹲低起勢鋤個地啲磚！頂，原來咁多人有鐵尺！咁點解唔直接用鐵尺打？
呢個時候，一個IT毒男爬咗上鐘樓。「我有鐳射Mouse，可以射啲紅光落佢度擾亂佢視線！」跟住拎住隻Mouse插條線落部Notebook度。呢個年代原來仲有人帶有線Mouse出街！Mouse底部頓時射出耀眼紅光，直射喪屍們令其方寸大亂！
「讓條路出嚟！」此時鐵尺小隊已略有小成。傘兵們立即有如紅海般分成兩邊，紅磚頓時如雨下，喪屍瞬間倒地！眾人終可稍息！
「條喪屍邊度嚟㗎？」大家開始不安地討論。
「我.....知佢邊度嚟！」一個乖學生樣嘅女仔語出驚人，大家都呆咗咁望住佢，等佢講下一句。
「Poly喺老蓮咁遠起棟Z Core，地底仲有個空咗嘅鐵路站，我就唔信冇古惑！有次我去嗰邊上堂，見到個著住實驗袍嘅男人口嗡嗡咁話唔知咩殺到嚟，香港九龍新界無得避，要化身玉皇大帝打救蒼生！跟住畀幾個著住軍裝咁嘅人捉返入Z Core！」
遠處傳嚟幾聲槍聲，眾人呆咗呆。「而家唔係講呢啲嘅時候，我哋上M Core到最高，睇下咩環境先！M Core有誠哥嘅力場保護，又要拍卡至上到去，冇咁易畀喪屍攻陷。」
所言甚是，大家對視點一點頭。「總之唔使驚！Poly本身就係設計嚟打仗用，呢場仗我哋冇得輸！」
PS 啓發自高登巴打XD
http://forum15.hkgolden.com/view.aspx…
z lib 在 how to download book using z library with"NO MONEY" 的推薦與評價
... <看更多>