【宅嬸的假期】
今日星期日假期，大家有乜節目呢？
我就如往常一樣，上晝喺屋企做家務、寫網誌、陪吓大咪小咪；下晝嚟院舍照顧肥媽。
噚日傍晚出外閒逛時買咗件T恤俾肥媽(細妹都有一件)，貪佢質地夠薄夠涼爽，夜晚幫肥媽沖涼已即時幫佢著咗。今日嚟到，肥媽背脊冇濕，幾好！等陣有時間走去掃多兩件！
眼見肥媽越嚟越瘦，嚟院舍前特登去素食店買咗杯湯俾佢～紅菜頭蘿蔔湯，佢飲湯我食渣，天作之合！
幫肥媽換片後，抱佢起身練行路兼按摩，之後再抱返佢上床幫佢剪指甲腳甲，咁又到佢食藥上奶時間。
下晝5：30，肥媽上完奶，幫佢洗好針筒奶壼後，準備食碗鼠糧沖杯熱華田做午餐，點知肥媽個肚咕嚕咕嚕，又嚟多舖大嘅！
嗱嗱臨食完碗鼠糧又幫佢換片，今日已經係第二次腹瀉，呢幾個月都係咁，奶已轉過四款，轉無可轉，難怪肥媽越嚟越瘦，我就只能乾著急，眼淚在心裡流……
下晝兩點嚟到開始，兩大兩細，我已換咗一包十片裝尿片！
頭先肥媽又突然咳唔停，連續打咗幾個大乞嚏，眼水鼻水口水一齊流，未夠半日，紙巾已經用咗盒半！
我真係唔敢想像，假如我唔喺肥媽身邊，佢會變成點樣？
同房另一位、同肥媽情況類似、插喉兼長時間臥床、但年紀應比肥媽大嘅婆婆個女，頭先終於出現…
佢，平時好少嚟，通常兩三星期一次，頭先嚟到，一如過往，靜靜企咗喺婆婆床尾三分鐘，冇埋過婆婆身，之後去厠所洗完手，就咁走咗！
婆婆全身唔同部位都有傷口、手、腳、屁股，每日都要洗傷口、換紗布…
佢從來唔會叫痛，只會喺喉嚨發出「呀…呀」聲，因為佢早已經講唔到嘢…
我，係一個宅嬸！
我，係一個返工對住阿婆，放工放假又對住阿婆嘅宅嬸！
我，除咗返工同返屋企之外，其餘時間都留喺老人院嘅悲傷宅嬸！
雖然好多時，我都會喺其他人面前咇哩巴啦，展露笑容…
「每一次都在孤單中堅強，每一次就算很受傷也不閃淚光…」
但我實在唔能夠真心感到輕鬆同開心！
多謝你花咁長時間睇到呢度…
如果你按下我專頁個網址，你將進一步窺見我嘅心聲…
我實在太冇用，請原諒我！
上奶時間 在 【母乳媽媽】真實上奶經驗 心情好奶量UP？ 想追奶變塞奶 ... 的推薦與評價
餵人奶係一個講極都講唔完嘅話題～今集要繼續分享，小編Ivy同Salome當時分別係點樣 上奶 嘅，仲有就係曾經以身試伏嘅分享…會導致塞奶嘅傻事做過唔少， ... ... <看更多>