在香港時嘅偽中產日子與在英國的真生活 (8)
現在無乜邊個小朋友响香港唔係食電子奶咀（iPhone呀、iPad呀之如此類）長大，其本上只要係坐得低嘅地方，起碼有八成以上嘅小朋友係攞住個電話或者iPad。但係有一批自認受高等教學嘅中產家長，就會同你講佢嗰小朋友唔好話Youtube，連電視都未睇過！社會上，充滿咗乜都唔比，做乜都唔好嘅家長。
我嘅成長嘅時期經歷咗電視世代，到後期嘅電腦，去到今日嘅手機年代。其本上每個時期，都會有好多唔同嘅所謂專家出黎講好多理論，講到電視、電腦同手機好似會殺死啲小朋友嘅毒物咁。但係，唔知點解又真係有好多家長深信喎，而且隨住時代發展同中產嘅學識增高，重越黎越信添。
咁其實，當年如果我阿媽响我細細個嗰時，完全唔比電視送飯；如果我中學嘅時候唔送部電腦比我，日玩夜玩三國志，我會唔會叻啲呢？會唔會成功啲呢？我相信唔多會，只會遠離社會多啲，亦開唔到厘個Page可以打到咁順暢嘅廣東話。結果可能變成一個四廿歲嘅中坑，只係識用舊式電話嘅人，唔知點解又自豪自己唔識用新嘢嘅人（其實我身邊真係有厘啲朋友，重懶有型咁）。
老實講，我個女都係食電子奶咀大嘅，一個「錯誤」嘅決定，佢兩歲多啲已經識Youtube厘個字。但係，我本人係唔信嗰啲所謂專家所講嘅嘢嘅，因為我只係相信小朋友係要適當嘅時候做適當嘅嘢，問題係家長本身有無份參與。而且，依家係乜嘢年代就應該跟著個時代走。
我真係唔想我個女大過咗之後，變成一個跟唔上社會正常生活模式去吸收資訊嘅人。大家諗一諗，電視潮流幾十年，電腦就廿幾年，智能手機未到十年（已經開始話幾年後可能被淘汰），接收資訊嘅工具嘅壽命越黎越短。如果好似嗰啲受高等教學嘅中產家長咁諗，唔通想教個野人出黎睇報紙（日常家務同自理都已經唔識啦喎）？
就算响香港，一個智能手機佔有率差唔多全世界最高嘅城市，我無見過小朋友响公園玩嘅時候或許响廸廸尼，會要求玩手機嘅。响香港嘅時候，兩公婆都忙，無辨法，無論玩，睇電視或者iPad要靠姐姐。而且，認真唔會放心比姐姐帶個小朋友去公園玩（香港中產嘅生活真係會令大家嘅親子活動好似好珍貴）。
但係到咗英國生活之後，我同老婆嘅親女活動係等於日常活動。無論玩玩具、去playground、睇電視或者Youtube，唔係是但一個就係一齊參與。同時，去playground基本上只要唔落雨就會日日都去。而睇手機或者iPad嘅時間亦因為有份一齊睇，加上有其它嘢做嘅原因，真係可以限制到小朋友嘅時間。
就係因為一齊睇，慢慢咁，我會發現其實個女睇Youtube都係好處多過壞處。至少我同佢可以有共同嘅話題，我幾自豪我基本上都識晒所有Ponies同Paw Patrol角色啲名㗎！有時我個女又會學Youtube啲小朋友學做家務同整cake（真係整，但係結果多數都係阿茂整餅咁樣）。
而且，我個女亦好多時只要我地提一提佢，會自己熄機，因為我地會同佢玩玩具或者睇下電視。我有機會真係想講英國嘅兒童電視節目，真係可以要幾有教育意義都有（連專門比有小小障礙嘅小朋友節目都有！）如果咁嘅質素嘅電視都話會學壞，真係無嘢講。其實用乜都好，只要陪住個小朋友一齊做，又點洗乜都話唔得，因為我地可以幫佢選擇嘅。
By the way，其實Youtube出咗專比小朋友嘅App，叫YT KIds，但係唔知點解香港未有。
#香港中產 #英國生活 #電話同電視唔一定有毒 #小朋友玩手機唔係死罪 #家長唔參與就係死罪 #親子係應該係每日嘅事 #有得玩iPad都可以唔要
有得玩ipad都可以唔要 在 六件開學必買抵玩iPad周邊科技用品！唔洗買Apple Pencil！// ft ... 的推薦與評價
多謝今次贊助Moral Bags！CECIL - Stealth Bomber Edition Kickstarter Campaign"30 Reasons Why You Need A Cecil Backpack":https://bit.ly/38grM4T ... ... <看更多>