【龔成問答信箱】（Q17661-Q17680）
Q17661：
成哥，你之前話恒生指數24,000下面係大市初步平宜，我想問而家加入左小米阿里巴巴呢啲新股票之後，大市24,000下仲算唔算係平價區
龔成老師：
你的疑問正確。
最近加入的成份股，都是處合理區頂至略貴水平，這就會令恆指在相同指數下，其實貴左。
因此，我地都要有少少調整，大約去到23000以，甚下落多少少，就是便宜區，比之前有所改變。
------------------------------------------------
Q17662：
1） 如果跟據歷史市盈率，大約係這個數。但當我地考慮一隻有潛力優質股，就唔可以單憑過去數字，去決定佢未來價值。
我地應因應佢未來情況，和整體質素去作些調整，中生（1177）佢合理市盈率，大約20-25倍會較合理。
2） & 3） 你計算大約正確，但具代表性每股盈利可以進取少少，大約CNY0.25。
其實最主要是這股是潛力股，你如果仔細分析，會見到佢過往的生意增長理想，同時ROE處高水平，加上這股派息比率不高，即是ROE在我地的「企業評估表」去給分，可以比「2分」。這是反映潛力度方向強。
當然，你估值時保守是較好的，因為太多預期的因素，參考價值會減少。但你的方向，基本上是正確的。
------------------------------------------------
Q17663：
龔成老師，呢期舊經濟股大落後，係咪買入既時機（不過似乎大部份未到便宜區）？定係可以等熊三先入市？
我之前在合理區買過貨，而家手頭上約有3成可用現金。
龔成老師：
應該咁樣講，以現時的疫情與經濟風險，舊經濟這樣的表現，是十分合理的。
只是新經濟類由於疫情反而有利，因此股價大升，令人覺得舊經濟公司無投資價值。
其實，新舊經濟公司都有當中的價值，我地投資，應該建立一個完整的組合，做好配置，各類的股票都要有，要平衡。
這刻，新經濟股反而投資值博率已無乜高（因為股價上左），反而用長線角度，舊經濟開始有投資值博率，不少都在合理區中下部，因此，分注投資已可進行，只要同時留有現金就得。你3成現金，可以等跌少少先入。
------------------------------------------------
Q17664：
龔Sir, 想請教下你對虛擬銀行的看法，本人今年加入阿里的虛擬銀行-螞蟻金服，之前共有十一年的傳統銀行經驗，因自己看好VB的發展前景，故想趁還算年輕時（32歲）大膽一試。
龔成老師：
虛擬銀行存有未知數，好難講具體的發展，雖然大家都知將來的應用會更廣，但市民接受的程度有幾多，時間要多長先能接受，唔知。不過，前景都是正面的。
你年輕，我認為可以去做，這一步值得行。
就算往後你公司發展有問題而你要離開，你翻去傳統銀行，你已經有一定的虛擬銀行知識，身價都會提高，始終傳統銀行都會發展網上業務。
------------------------------------------------
Q17665：
老師你好:你話現時樓價高，買樓的值搏率低，如沒有急切的住屋需要，現時投資優質股較好。
我有一事，想老師你分析一下:
本人現時返9-5的䕶士，放星期六、日同公衆假期，不用輪班。基於要照顧小朋友，所以一直都沒有再讀書去令自己的事業再上一層樓。
因為如果想晋升，我必須放棄現有的穩定工作，改要返病房的輪班工作同每4至5日便要返一晚夜班。工作壓力一定比現在更大，責任更重。
現在小朋友已長大，不用我花時間去照顧，時不時內心又想起讀書晋升一事。由於讀書係要老細批准，學費自費要10萬多啲，最快都要2022年先可以開始讀。
讀書加實習也要三年時間，即成件事順利進行，最快都要2024-2025先可以完成，人工會較現在最少多$5000，那時我已55歲，仲有5年便退休。
根據以上情況，是否值搏率低呢？
還是我繼續過我的安穩日子，利用空餘時間去學習投資或做自己喜歡的事呢？
龔成老師：
你投入的資金是$10萬，而得到是$5000一個月，即是1年6萬，你到時仲有5年退休，即是預期得到$30萬。
如果再考慮你要投入的時間，假設你要投入500小時，而你每小時價值$200，你投入的時間成本，就是$10萬。
即是你共投資$20萬去換取$30萬，從投資與回報的角度，只是一般般。
如果考慮到你要花心力去進行，整個計劃的價值只能算是中等，並不算好值得做。反而關鍵位，就是錢以外的野，如果單講錢，只是一般，但如果這是你的好想做的事，情況就不一樣，你要從這方面去思考。
------------------------------------------------
Q17666：
Hello 成哥 好耐無問問題了
恭喜你 做得愈來愈好 身邊好多朋友都開始認同及陸續追隨你的投資策略
由我開始用你既方法投資到現在 成績都好理想
就算大市短期咁波動 都可以保持到自己既理性情緒
以儲優質股為目標
現在仍然係一半現金 一半股票既配置
由於總資產增長了不少
現時擁有
150萬現金
150萬股票
股票組合中可有6%利息回報
由於我既日常開支唔係大太
每月會用10000$左右
扣除開支 每月盈餘有10萬左右
當中有10000$係用作月供12（恒基）
其餘90000備用
以現時情況 你認為減少現金比例買入更多優質股是否合適嗎
或者使用銀行低息貸款買入優質股進行少量槓桿 可行嗎
最近有留意
1530 你認為係屬於優質股嗎
如果以長線持有 現價係屬於便宜區域 或者幾多先係便宜區呢 。謝謝你
龔成老師：
你現時持有$150萬現金，可以將部分資金投資，好好利用，$50萬動用作投資無問題。分注就得。
如果你組合潛力股或新經濟類股不多，可以加少少。另外，不少傳統經濟股現價在合理區中下部，已經有投資值博率，你分注投資同樣可以。
至於借貸投資，這刻大市未到這時候，加上你本身都有一定的現金，這刻不用這樣做。
三生製藥（1530）有質素的，但股價上落較大，要留意風險，而盈利都有點波動，現價在合理區，都可考慮，不過就要注意風險。
另外，以你的情況，財富仍有一定的增值力，建議你進一步提升投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q17667：
成哥 半年前問你 我一路睇你D片跟你學野 36蚊位買左比亞迪用倍升黎做指標最近72止左賺 最近返左黎香港更加買左你D書準備上你堂 多謝你先
最近我想問問6969 1477 同1810你覺得有冇潛力 值唔值得長揸？唔該曬成哥
龔成老師：
太好了！只要合理投資，睇倍計回報不是無可能的！
思摩爾國際（6969）有當中的獨特性，業務長遠有增長力，有長線投資的價值，不過就擔心股價已貴，所以如果有貨可持有，無貨就要較小心。
歐康維視生物（1477）為中國眼科醫藥平台公司，從事開發及商業化眼科療法，業務有危有機，投資要注意風險，這股始終處燒銀紙的狀態，因此值博率只是中等。
小米（1810）有發展力，中短期可能會較波動，但長遠正面，現價在合理區中上部。這股可長線。
------------------------------------------------
Q17668：
老師，我因計劃移民，沽左自住樓套現，其資金除了買778外，還有什麼投資可成為在移民過渡期帶來穩定的回報應付住屋租金？
龔成老師：
如果你目標是計劃移民，賣出自住物業，然後投資一個「房託組合」都可以的。
持有房託的流動性較高，對你會較為有利。始終會較靈活。
不過就唔好只持有一隻房託，你可以持有一個組合，領展（0823）、陽光（0435）、置富（0778）等（你可以睇《50穩健收息股》），建立一個平衡組合。
如果香港的物業及租金上升，這些房託都會上升，就可以對沖你賣樓後租樓的風險。因此可以有效利用股息，去支付租金。
------------------------------------------------
Q17669：
你好 我有啲投資股票嘅疑難想請教你
我嚟緊大學year one，本身都有投資股票，已經$215買咗一手阿里巴巴，依家仲有兩萬幾蚊積蓄，想買多隻股票，而我睇左你本50優質潛力股
當中有兩隻煤氣同埋必瘦站都有興趣，你個人建議我應該入邊隻好啲？
兩隻我都係打算長線投資
龔成老師：
以你的年齡，投資較有增長力的股會較適合，建議你部分資金投資盈富（2800），部分資金則投資較有增長力的股。
阿里（9988）有質素有增長力，你可以長線持有。
上述兩股，你可以選必瘦站（1830），增長力會強少少，不過，唔建議投資太多，只可以成為組合其中一隻，你可以加入2800平衡組合。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q17670：
龔成老師，看過你多本書，大多深入淺出，比較易懂。本人三十多歲，現時才明白何為財務自由。起步較遲。
現想請教，我持有8800股2238（廣汽），成本價$9左右，請問你認為這股如何，該如何操作，謝謝
龔成老師：
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你應該建立一個「組合」，唔好只集中單一股票，否則風險較高。當中可以平穩增長股，加少少潛力股。
廣汽（2238）都有質素的，不過生意近年有下跌情況，盈利有點波動。整體都是正面，但增長力未必好強。
守住先都可以，但預佢上翻去都要時間，同時唔建議持有過多。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q17671：
龔成老師，小弟30歲，澳門人，每月約能儲蓄5～6k，一年前開始向你學習投資優質股，期間眼見手上的中生升上歷史高位然後回落，心情又平淡變成興奮，再由興奮變成壓抑。
心中的鬱悶情緒或不耐煩經常令我做錯決定，亦不時產生同身邊投資有成的人比較。
但我知道亦認同價值投資才是財富增值的方法，我亦有睇緊幾本您的著作，期待不久將來能參加您的課程學習更多知識。
我自問自己對市場和經濟的觸覺較差，在學習的過程中，不知您有冇咩建議可以俾我?
另外就係想問下778，佢係社會和外圍環境下股價回落左不小，我持有的平均價大概係7.5左右，雖然您說很難預測大市走勢，但我覺得佢好難升得返去以前的價位，想問下面對呢d情況下應該點部署?謝謝
龔成老師：
你要克服的，是「心理因素」，好多散戶都有你這樣的問題，而佢地無法賺大錢，正正是心理問題。
股票在中短期，要上上落落，好正常，我過往做銀行，見唔少客戶買入港交所（0388），佢地的買入價，不少都在$15-$18，可惜，我見到有95%的客，在$20已賣，去到$50，差不多99%已賣。可以持有去到$300的是極少。
佢地本來能夠賺到幾百萬，甚至過千萬，但就是因為「成日睇住個市」，心急賣，所以自己放棄這機會，這些例及我過往見好多，騰訊（0700）就更誇張。
所以，你想與一般散戶不同，就要學識心理控制，學識長線，這是賺大錢一定要掌握的。
另外，建議你多睇巴菲特相關的書，對你有利，遲些疫情過去，我都會再到澳門開班。
你記住，只需「選對優質、有增長力的股，長線投資，就得」。
置富（0778）是不差的股息，但這只是收息股，增長力不算強，你買入價合理，可持有。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q17672：
阿Sir, 我和先生已經過40歲，共月入約8萬，有一層私樓供緊，今年年尾就過三年。現金不多，只有幾十萬
1）我想問可以點樣投資令到快啲財務自由，因為我想盡快可以全職湊小朋友
2）因為現在間樓是用老公名義買的，我自己有諗過用首次置業買一間細跟住出租
本身自住嗰間就租比人，自己再租一間大。你覺得這個方法可行嗎？
龔成老師：
1）投資無得急，一定要規律，平衡去進行。由於你地現時現金唔需多，就算投資收息類產品，每月得到的被動收入都唔會多。
因此，可運用「先增值，後現金流」作方法，例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你地這刻可投資「平穩增長股」+「潛力股」，希望盡力令財富滾大。
你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
2）這都是一個可行的方向，但要先解決資金等問題，現時香港物業的租金回報率唔算高，因此就算收租樓，如果是有一定的按揭，每月都未必有正現金流。
所以，你這刻要做到，反而是集中力量，先滾大資金，努力儲蓄及利用投資增值。
------------------------------------------------
Q17673：
老師你好，939，我有5.9十手，打算中線投資，想請教你覺得如何？
手中更持有
5手匯豐$54，
4手中銀香港$38，
5手中國鐵塔$2.06
全部都係高位入，同埋睇完你先知道要分散板塊投資，手持太多銀行股，之後會開始睇書慢慢學習。
現時有二十萬現金，想了解老師認為現時可如何部署投資計劃，有無邊隻唔留得。十分感謝！
龔成老師：
銀行股的比例太高，出現了集中風險，同一行業佔股票組合比例太高就要小心。
如果可以的話，之後要慢慢減持，平衡翻個組合。
上述的股票不是無質素，但中短期都會弱，要慢慢先好翻D，同時要上翻買入價要耐心。幾隻的質素都接近，所以如果上翻，同時去減都得，無話特別先減那一隻。
至於中國鐵塔（0788），可持有，這股有長線投資價值。
------------------------------------------------
Q17674：
老師你好 請問，2800而家價錢小注適合嗎？
1137 我4.x入左一手 適合長揸嗎？
定係趁而家放左佢
龔成老師：
盈富（2800）現價合理，可分注投資，長線持有。
至於香港電視（1137），有潛力的，不過股價好波動，有時香港因中短期疫情，股價就會大升，之後會回翻。我長線睇好這股的，不過有時都貴。
你可以考慮賣一半，餘下就長線，這是較平衡的做法。
------------------------------------------------
Q17675：
你好！ 關於 課堂 有幾個問題想了解
1）學生學的和你的書有什麽分別， 因爲你的書我差不多看完了
2 ）對於了解企業之外，我們會否可了解 莊家如何在背後賣衍生工具，因爲投資銀行都是幫最有錢的人賺錢，賣產品比其他人。
3）課堂會否學如何辨別牛1-3 等等見頂訊號
4）股評人行業運作 有一些 股評人會R名牌折扣 又或者是會被一些公司選中作推介
龔成老師：
1）課堂過半內容，都是無在書講過的，而一些實戰，更具體的投資技巧，都只會有課堂講述。
例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。
2）如果你炒的是細價股及莊家股，就要相關技巧，但課程以大型企業為主，教你選一些有質素的企業，因此莊家概念並不在課租內容裡。
3）會。其實會講述一些指標，買入時機、賣出時機的指標。
4）這並不在課程內容。
雖然有些細價股，的確會有股評人收錢而推介，但只要我地投資「有質素的企業」，就不用擔心這類行為。
------------------------------------------------
Q17676：
你好龔成老師，想請教下: (我40+歲)
現持有組合：
長和 503 股
香港中華煤氣 580 股
匯豐控股 1,000股
恒生銀行 111 股
港鐵公司 1,000股
香港交易所240股
領展房產基金 870 股
建設銀行 4,280股
長江基建集團 500股
華潤置地 260 股
工商銀行 4,180股
金沙中國有限公司 580 股
中銀香港 1,570股
盈富基金 1,09股
交通銀行 3,930股
中國銀行 2,200股
這樣既組合是否可以。
想供月供股，每月$5,000，阿里（9988）-$3000 & 比亞迪（1211）$2000? 不知道可以適合我 ? 請問你會建議我買哪些股票呢?盼回覆～謝謝！
龔成老師：
你40歲，財富仍有增長力，雖然不是高增長，但都可以在組合加上一些有潛力的股，只要控制好比例就得。
現時你持有的股票，不是無質素，但銀行股太多，同時都只是一些收息股或平穩型的股票，組合增長有限。如果日後銀行股上翻D，其實可考慮減部分銀行股，將資金投資其他會更好。
至於每月供阿里（9988）$3000、比亞迪（1211）$2000，可以，我相信加這2股在組合，適合你的。現時已可進行。
但要留意，現時大市波動，你可以一邊投資一邊留現金（即是你手上都要有一定的現金，唔好用盡），而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q17677：
龔sir 你好，從3月開始月供緊比亞迪1211 ，每月1000蚊，現均價大約48蚊左右，但見e排1211都80蚊邊，請問係要停供嗎？請問係幾錢以上停供？幾錢以下可以供返？
唔該龔sir
龔成老師：
你可以$80以下都照供，如果上到$80以上就停一停，這股可長線，但擔心你貨較少。
這股波動，你照這策略去供就得。
------------------------------------------------
Q17678：
龔sir 想問下777點睇？
有潛力嗎 現價可入？
龔成老師：
網龍（0777）主要從事網絡遊戲開發（包括遊戲設計、編程及繪圖）及網絡遊戲營運；教育業務；移動解決方案及移動營銷業務。
過往業務都不差，有一定的增長，不過就有潛在波動，現價都算合理價，不過就唔建議太大注。
------------------------------------------------
Q17679：
你好 龔sir! 有少少關於1212 利福國際問題想問下的
我呢排睇返佢2019 嘅年報，見到佢係資產負責表中，負責比率達84%。
因為佢係啟徳地皮的發展項目前景吸引，所以我早前以平均價$6.9買入，打算長線持有。
想問下它現時的高負責比率會大大令佢的中期風險增加嗎？甚至有倒閉的風險？謝謝。
另外，想問下出年甚麼月份左右有股票的基礎班？
龔成老師：
利福國際（1212）的負債的確高，這會對企業造成風險，所以這部分都會扣左少少分。
不過，見佢持有一定的現金，相信佢有足夠的實力去過渡。中短期因香港情況當然會弱，但長遠無問題的，只要你唔好太過大注投資，就得。這股值得長線，現價在合理區中下部。
下年時間未知的，你預我每隔1、2個月都會開一班。
------------------------------------------------
Q17680：
老師，我之前預留左六十萬現金打算加埋先生的錢買樓用, 所以一路只做定期 (當時都有約2-2.4%息). 但現在可能會考慮移民.
所以呢筆錢應該會係一年後用..原本都係諗住定期, 但而家息好低..得1%最多, 所以我諗緊好唔好用一部份買啲相對穏定的收息股, 考慮緊港燈.
不過短期始終有上落, 如果我大概用佢2年底位($7.5)去估算有可能的損失合理嗎? 如果以約$7.9買入,
咁大概低位係比$7.9跌5%. 但利息大概4%, 係咪如果真係跌多過呢個數先真係蝕錢? 唔知呢個計法岩唔岩...
另外老師會有更好的提議點利用呢筆錢嗎?
謝謝!!
龔成老師：
由於你的資金有實際用途，我會建議你持有現金。
港燈（2638）去到$7.5，雖然風險已不高，但有時當股市波動，出現中短期下跌都有可能，雖然慢慢會上翻，但問題是你無足夠的時間去守。
或者你可以投資小部分資金，例如$20萬，就算到時股價下跌，風險亦較易控制。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
中華網龍股價 在 網龍(3083.TWO) 走勢圖- Yahoo奇摩股市 的相關結果
網龍 即時行情 · 成交46.70 · 開盤46.70 · 最高47.10 · 最低46.55 · 均價46.85 · 成交金額(億)0.164 · 昨收46.15 · 漲跌幅1.19% ... ... <看更多>