【今年升職有冇我份？】#以下5點你做唔做到 #升職唔好剩係睇工作表現
以往每逢年尾都係同事最期待嘅 moment，唔單止假多，仲有機會派雙糧bonus。老實講，今年市況咁差，無被裁員其實已經不幸中之大幸，至於有無機會派bonus，真係好睇行業有無受疫情影響。早幾日喺商會同幾個老闆傾開，佢地都講bonus真係未必有得派，但為咗留住人才，都一樣會考慮對有表現嘅員工升職加人工。至於升職除左睇工作表現之外，其他細節位不少上司都會看在眼內，不妨問問自己有無同樣做到？
1) 工作有表現
如題，呢個真係無需多講。
2) 你同公司文化有無in-sync?
人無完美，如果員工性格缺點不影響實際工作表現，上司唔會牟牟然指責；但如果性格同作風跟公司文化太大出入，任你表現幾好，上司都會認為你難以駕馭，甚至會怕你能力和權力越大時有機會搞分化。所以這一點需要注意。
P.S. 但又咁講，如果你明知道公司文化同自己作風唔同都要繼續堅持落去，相信你都志不在此吧
3) 領導才能 你鍾意自己做定同同事一齊做？
如果你個人能力爆燈，但比較喜歡自己做，認為教得人地自己都做左，甚至對其他同事彈多過讚，比在我係你上司，我最多會想加你人工留住你繼續做好手頭上的工作，而唔係升你職。雖知道越高職位，某程度上代表需要越高領導才能。有時會見到有啲員工個人能力唔係特別出色，但偏偏好有能力令身邊的同事同佢一齊協作，最後推動整個project成功，呢啲通常都係做manager嘅材料。
4) 你係Problem Solver，定係Problem Generator?
識得搵到問題係第一步，但無諗問題點去解決就係 Problem Generator。要在眾人中高下立見，就係要做Problem Solver，提出問題時要附帶解決方法，聽落好簡單，但小弟想講現實職場「講就易，做就難」。如果你做得到，就能夠反映你具備作為上司的心態。
5) 誠信
就算能力再高，但誠信出現問題真係好難搞，好似自己做錯唔認、Claim 錢報大數、洩漏公司商業機密又或者故意欺騙等等行為，呢個已經係人格問題，老實講，上司對你再投信任一票就如大海撈針，點做都補救唔到。
能夠升職與否雖然不由你選擇，有時可能好講人緣、人脈、關係，但以上各點都係你個人能夠控制到嘅地方，每個細節位其實都反映到你的IQ、EQ、Vision、Attitude同Ability。細節決定成敗，大家想升職的話，不妨留意一下自己有無具備以上條件，共勉之！
