《機場流浪記最終回》
上回講到《嫂陷夜巴黎》。咁到底之後有無順利到港呢？欲知後事如何，請聽而家分解。喺巴黎過左晚夜，訓到飽一飽就去機場，諗住check in 歸家。一去到機場，check in條隊好似由九龍半島排到法羅群島咁，而移動嘅速度比蝸牛更慢。排左半個鐘，只係移動左大概10cm。後來有個法國叔叔忍唔住離隊去搵地勤問過究竟，佢返黎笑晒咁，我以為無事啦，點知原來係苦笑。「地勤話架機整唔好，今日班機都取消呀。」😱😱😱原來條隊咁慢係因為佢將乘客逐個逐個掉緊去其他航空公司嘅機。本來三點起飛，取消之後有d乘客被掉去夜晚11點起飛前往多哈嘅航班，問佢喺多哈幾時返到香港，地勤話佢唔知🤷🏻♀️咁邊個知呢？而佢又遲遲唔做廣播，喺後面排隊嘅乘客仲以為有得上機。我呢d攞員工飛嘅當然無聲出，但我見其他乘客真係好慘，好多喺香港轉機，佢地嘅計劃完全被打亂晒。黑仔嘅我死死地氣決定捱貴稅飛去倫敦再飛返香港。但係倫敦個機場大到無倫，由一個Terminal 去另一個Terminal 要成廿分鐘。我去到check in 嘅時候，個地勤姐話5分鐘前close 左，唔畀再check in 😭佢仲鬧我做咩唔早d。
「你估我想架？我本來返香港過聖誕架。我一個禮拜經歷兩班機取消。今日28號啦，我仲喺歐洲呀。我已經好攰，唔準你再話我呀。」
我係想咁樣覆佢，但事實本人比較無膽，所以現實係：
「唔好意思呀，咁可唔可以安排我去下班機呀。」
地勤姐姐好似被我嘅「友善」嚇一嚇，佢都唔好意思，於是態度一轉：「我幫你轉下一班啦。」
拿～都話你對人好，人對你好架啦。於是我喺倫敦機場留左3個鐘就起飛返香港啦～
好滾動，最後係順利到港。呢個禮拜有如坐過山車。法羅群島班機取消係唔開心，但係因為咁可以同大地之子過聖誕；巴黎班機取消係唔開心，但係安排左一晚酒店有好味自助餐食；巴黎班機再次取消係唔開心，但去倫敦喺機場食左個好味烏冬。塞翁失馬，焉知非福。一星期去左五個機場，訓左兩間酒店，仲密過以前返工呀😂都係一個難忘嘅經歷，我永遠會記得2017嘅聖誕。否極泰來，行完衰運，2018會更好☺️
P.S:大家喺張圖搵唔搵到著名嘅Tower Bridge 呀？😂
---------------------------------------------------
❤️如果想睇更多大地之嫂同大地之子嘅無聊小故事，大家記得去我個page度較返See first 呀！
❤️仲有要記得follow埋ig: whereisfaroeislands ，
https://www.instagram.com/whereisfaroeislands
