【阿肥報平安！】
難得死唔去，報個平安先！
手術已經完成！傷口仍有出血同隱隱作痛！(不過正常嘅！)
今次有咗人生新體驗，我覺得自己又成長咗不少！
以前通常擔任照顧者陪同家人進出醫院，今次終於輪到自己成為主角了！
或者因為抱住肥媽抗戰十四年四個月零廿二日嘅日子過得太艱難、太痛苦、太委屈、太深刻，多年來累積返嚟嘅血淚同勇氣，造就咗我獨力面對同打不死的精神！
個個都有人陪入院出院，唯獨我一個，唔想俾任何人知、亦唔想任何人幫；我唔需要人陪我，亦唔想麻煩任何人！
簡單講，除咗肥媽，我唔想再同任何人接近！
今次我住婦產科三人房，鄰床兩位病人都應該同我做類似嘅手術！
左邊嗰個，男朋友陪到夜一夜(晚上10：40超哂時)都唔肯離開，第二朝一大清早7：00未到又嚟過！
右邊嗰個，做手術前一晚深夜同做手術麻醉醒返後，拎住部電話同男朋友喊到fei li fe lei！
唯獨我一個，心境好平靜；不過就係因為太平靜，護士叫咗院牧嚟探我！
我同院牧講，其實我好想快啲返去肥媽身邊，所以之前我一直猶豫做唔做手術？因為唔做嘅話，我希望可以死快啲！但之後又覺得自己冇勇氣，以前逼肥媽接受各種可怕痛苦嘅治療，到自己有事時就退縮，所以最後都決定自己爬入嚟！
院牧都俾我攪到冇乜嘢好講，最後只好為我祈禱！(多謝你！)
冇幾耐，護士入嚟話我血色素太低(8.6)，要我抽多次血，配定血以備不時之需！
呢度嘅護士手勢真係好，往往一針見血；唔似肥媽以前喺明愛醫院俾人拮到全手五六個針孔都搵唔到條血管，態度仲要超惡劣；攪到肥媽委屈又痛到喊，我就氣憤同心痛到喊！
手術前一晚，我成晚都冇瞓過，含住兩粒脷底丸後又凍到不停打冷震；之後問護士攞多張暖氈先好啲！
早上六點幾起身梳洗，換上手術袍後，我自拍咗以下呢張相！
雖然冇乜點瞓過，但我覺得自己依舊咁精神！呢個素質係以前成日漏夜讀書讀到唔肯瞓、之後每日工作同照顧肥媽，晚晚瞓得三四個鐘鍛鍊出嚟！
被推往手術室途中，我望住天花板嘅燈眼到唔眨；我好想記住每一幕，感受吓肥媽以前喺醫院被人推嚟推去時嘅感覺！
「肥媽，辛苦妳了！」
瞓喺手術室等候區期間，見啲醫生護士忙到氹氹轉，唔少老公要入嚟陪產，護士要逐一安排！
之後麻醉科鄺醫生同主診玉醫生走埋嚟我床邊見我，問完我一大輪問題後，準備推我入手術室了！
我內心同肥媽講：「媽，我入去喇！如果我醒唔返，妳記得第一時間嚟接我！如果我死唔去，希望妳能繼續保佑我有勇氣行落去！」
結果，瞓醒一覺，死唔去！不過因為貧血，醫生要我滴完一大包鐵水、瞓多幾個鐘先准走！
由於術後傷口有頗多血流出，加上我又有貧血，所以護士知道我自己一個走時都有啲擔心！
我話冇事喎！我自己handle到！我特登唔俾人知嘅！我唔想任何人嚟探我，包括我細妹！
佢哋見我冇叫餐，又哦：「妳麻醉藥過後有冇叫嘢食？我驚妳會暈！」
由於我一啲都唔覺餓，加上平日只吃鼠糧同杯麵，所以對個餐牌一啲興趣都冇！
「妳唔食啲嘢，我唔可以俾妳走！」
最終，我飲咗盒自己帶入去嘅375ml朱古力維他奶！
平日工作，成日有老人家要求搵陪診；好多人病咗都希望有人關懷同照顧；但我發覺自己好唔一樣！
我唔想任何人關懷、探望同照顧自己！我一生人最需要人幫忙嘅時候已過，嗰段時間為期十四年四個月零廿二日，係我抱住肥媽抗戰嘅艱難日子！當年曾經出現喺我同肥媽身旁，關懷、體諒同幫助過我哋嘅人我心存感激，但之後因角色身份被逼扮演嘅寒暄慰問，就真的不用了！
在此，感謝主診醫生玉醫生、麻醉科鄺醫生、以及浸會醫院曾經幫助同照顧我嘅每一位同事；以及曾經來到這片夜空為我打氣嘅每一位朋友！
既然今次死唔去，相信有排捱落去！
雖然傷口仲未好、有一大堆藥要食、稍後要覆診、同要攞化驗報告，但我絕對應付得到！
呢一張入手術室前嘅相就係最好證明！
大家放心！我可以的！
因為我係肥媽嘅二女兒～阿肥！
肥媽保佑！阿肥加油！
寒轉111 在 寒轉 的推薦與評價
與寒轉有關的話題. ... 寒轉錄取成大水利中山海工中興水保、土木。 ... 到了這裡發現根本悲劇，原本已經沒有勇氣再考試了，但現在有了想轉學的念頭...，暑轉的話. 111. ... <看更多>