我們醫院每星期都有一次記憶科門診，專門為患有認知障礙症的老友記診症。門診在早上，時間比較鬆動，能夠花更多時間處理病友和家屬的各樣問題。
今天記憶科門診有一位醫學生來學習，她剛考完試，特意利用暑假來了解一下醫院的運作。
「婆婆你好呀，後面個個係你邊位呀？」84歲的婆婆坐在輪椅上，由女兒推進診症室。根據記錄，婆婆上年被診斷認知障礙症，故此被轉介給我們。今天是我第一次見她。
「佢？我呀媽囉。」婆婆答道。一些患有認知障礙症的病友，連朝夕相對的至親都認不到。
「佢係你個女呀。」我對着她說。她望一望女兒，然後望着我微笑着。
「你同邊個住㗎？」
「咪 xx 邨囉。」
「唔係呀，佢上個月搬咗去老人院囉。」女兒開腔。
「點解上個月搬咗去老人院嘅？」我對女兒說。翻查紀錄，婆婆之前是獨居在公屋的。突然要入住老人院，我當然想了解一下原因。
「佢成日夜晚走咗出街遊蕩呀，晚晚係咁都唔係辦法，成日攪到人地我都好麻煩，我真係攪唔掂。。。」說着說着 ，女兒突然激動起來，眼淚從雙眼流出來: 「我仲有個呀哥有精神病要我照顧，我一個人真係好大壓力好辛苦呀。。。」
面對着失智的年老媽媽和精神不佳的年壯哥哥，獨力承擔着照顧的重擔，壓力可想而知。婆婆入往老人院的原因亦顯而易見。
「係呀，一個人要照顧哂兩個屋企人，一定好辛苦，所以唔好攬哂上身，一定要搵人幫手呀。」我嘗試安慰着女兒。
「係呀，好彩出面啲社工好幫手，多得佢地，宜家呀媽入咗老人院我放鬆咗好多。」女兒對我說。
居家安老當然有其優勝之處，但有時因為種種不同客觀因素，長者在老人院居住，接受適切的照顧，或許是更好的選擇。
「你知唔知我竟然試過壓力大到。。。有一刻想。。。整死我呀媽算數。。。」女兒頓時淚流披面。
想着自己竟然對疼惜的媽媽有着如此念頭，又把她送到老人院去，眼淚或許包含了一點內疚和歉意。
照顧者的壓力，真的不能忽略！一個人面對着看似解決不了的重擔，突然想不開，什麼衝動，不理後果的事情都可能做出來。
「所以媽媽宜家係老人院，你會輕鬆啲。你都要錫住自己呀！有嘢一定要搵人傾。」我再三叮囑。
「我會㗎啦，宜家已經好咗好多㗎啦。」女兒也冷靜了一點。
婆婆和女兒離開後，我問同學: 「你覺得點呀？」
「我第一次見屋企人喊，佢一定係好大壓力！」同學的回應應該是發自内心的感受。
希望同學能記住這刻的感動，以後面對遇着困難的照顧者時，能夠身同感受，為他們作出最好的建議和安排。
