【龔成問答信箱】（Q18461-Q18480）
Q18461：
成Sir你好，多謝你成日解答我問題。
睇左你七本書、暫時上左幾堂初級班，我已大概有能力選擇優質股和合理價位。由三月到宜家都有正回報。
不過在潛力股上碰到一些難題，自己選擇了[email protected] 和[email protected]。
兩者相比起atmx的升幅簡直差天共地。究竟我有沒有選擇錯呢？
龔成老師：
記住，我地投資最重要是長期，唔好太著重中短期的表現。
每隻股票都有佢的特性，你上述兩股，都是有質素的，不過舜宇光學科技（2382）中短期較一般，現價合理區中上部，而中國鐵塔（0788）潛力度不及atmx。
不過，有時你好難咁樣比，例如美團（3690），的確升幅理想，但之前未有盈利，近期先開始有，這就是不確定性，即是你之前如果投資美團，其實承受的風險會較高。我地投資者一定要理性，不能在美團升左後，才講早知我買，而是要明白，該股的風險度的確較高，理性分析自己是否適合，同時是否有能力分析。
如果你強行比較而有跟唔到的感覺，你就犯了投資者的錯誤，心理問題要小心！如果見到別人賺錢而自己無得賺時，有不安感，都是有問題的！
中國鐵塔（0788）有質素的。這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。
考慮到佢的質素、發展能力，這股算是合理價。
由於這股有發展力，可長線。
------------------------------------------------
Q18462：
老師你好，最近開始留意你嘅分享，本人從未買過股票，過往十幾年都係買基金同保險作為保本投資，今年37歲想請教以下問題，感謝
月入20-30k( 佣金制）
可動用現金$15萬＋$11萬人民幣
$20萬基金（約6-7厘回報）
年供約$40,000保險（當中有醫療及儲錢）
現階段每月可儲$8,000
目標5年增值至200萬請有冇可能？
最近有開始留意以下幾隻股票，請問適唔適合我嘅情況？435，778，6823，003
如合適，請問如何分配較合適？
謝謝
龔成老師：
現時每月儲$8000，就算連同原有的資產，要5年累積到$200萬，並不容易，你可能承受太高的風險，而這往往會有不太好的結果。
因此，建議你定目標$100萬-$150萬，這會比較合理。
另外，你留意的4隻股，都是偏向收息的，如果你是低風險投資者，想收息，都可以。但你37歲，以$100萬-$150萬，就應該「增值」。
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
你可以自行分注投資，或同供。例如月供$5000。
你可以考慮盈富（2800）$2000。
另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。
如果你不懂股，就集中供盈富$5000。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18463：
老師～請問你點睇北京汽車同維亞生物？
龔成老師：
北京汽車（1958）質素只是中等。
佢主要於中國從事乘用車車型設計、研發、製造及銷售，及提供相關服務，乘用車包括轎車、運動型多用途汽車（ＳＵＶ）、多功能乘用車（ＭＰＶ）及交叉型乘用車。
集團亦通過持有51%權益之北京奔馳汽車產銷梅賽德斯－奔馳品牌（Ｍｅｒｃｅｄｅｓ－Ｂｅｎｚ）乘用車，並為中國唯一一家該品牌的轎車及ＳＵＶ之製造商。
另外睇翻佢資料，佢的自主品牌包括以下三大產品系列「紳寶」「北京」「威旺」。
表面上好似有d品牌價值，但過往業績一向都一般般，盈利波動，同時無太大的增長力，反映產品的賺錢能力唔算強。
同時品牌對經濟有一定的敏感度，而近年中國經濟一般，影響生意，相信這情況會持續一段時間。
現價合理，但長遠的發展力唔算好強。
至於維亞生物（1873）雖然業務有發展，但有風險。
佢主要就臨床前藥物開發提供基於結構的藥物發現服務，例如基因到蛋白質（Ｇ２Ｐ）及基因到結構（Ｇ２Ｓ）。
睇翻佢主要客戶，主要包括位於美國、中國、歐洲等地的製藥及生物科技公司。
生意都有不差的增長，但毛利變化大，企業賺錢能力仍有不確定性，以估值計，現價唔算平。
業務是有發展的，但仍有好多不確定性，因此，最好等回少少先小注投資。
------------------------------------------------
Q18464：
你好，我睇緊你的書，想問下除了股票，你覺得現在可以留意什麼作投資？例如你提到商品，專利，藥方，有冇咩可以介紹？
龔成老師：
你可以「買入資產」，例如買物業、車位、股票，就是持有資產的方法。
你又可以創造資產，例如我寫了一本書，就是一個資產。你可以建立一盤生意，都是創立資產的方法。
------------------------------------------------
Q18465：
你好，中國神華可以嗎？收息高，但未見您納入收息組合。
龔成老師：
中國神華（1088）質素中等，過往較有質素，近年有減弱情況。
佢始終有一定規模，但政策不是好支持行業，的確會對佢有影響，但已經在股價反映左。
另外，由於佢地的產品自主力較弱，因此不算好高質。
所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。
所以整體來講，這股不算差，但又不算非常好，唔好對股價有太大的期望。如果是收息的，都可以，但就唔建議太大注。
------------------------------------------------
Q18466：
想請問1083 有沒有潛力作長線投資？
龔成老師：
港華燃氣（1083）正面的，大股東係中華煤氣（0003），有質素。近年增長力略減，但整體仍是好有質素。
佢通過與國有燃氣生產、銷售和儲運企業的合資合作，先後在安徽、廣東、黑龍江等十個省份及直轄市成立了多間控股企業。
其本上，佢已經形成了以終端服務體系為核心，涵蓋燃氣精製、倉儲、輸配、銷售及城市燃氣管網建設等完善的運行體系。
近年佢生意都能保持增長，但就不是高速度，而是平穩增長，而盈利同樣能保持平穩增長，前景正面，但就不是爆升的類型，這股有投資價值，同埋可以長線持有。現價合理區。
------------------------------------------------
Q18467：
成哥您好！剛睇完你17年出版的書《大富翁致富藍圖》，想問你現在的對投資看法會否有所改變？
畢竟已經過社運和疫情，再加上港版國安法，未來的士牌和物業會否值長期持有？
龔成老師：
整體無太大改變，香港樓市中短期會轉弱，主要受經濟影響，不過在長遠來說，仍是會向上的，這是由於供求問題。
因此，如果想買樓，可以留意接下來的1、2年，會唔會出現下定的跌幅，如果見到，就可以把握時機入市（但不要預佢跌好多）。
我相信長遠香港樓的基本面無有太大改變。
至於的士牌，中短期會弱，而長遠則中等，因為市場結構同過往有所不同，多左叫車等對手。因此，預期增長力不強，但始終不會太差，平穩型。
------------------------------------------------
Q18468：
龔sir你好，我依家持有兩手港鐵，1手中國生物製藥。
1.想問煤氣依家價位抵唔抵買？
2.煤氣算係收息股定增值股？
3.港鐵現時價位又應唔應該再分注入定再落多少少入比較好？
4.如果我港鐵+中國生物+煤氣另再+盈富呢個組合有無問題？感謝
龔成老師：
1）仍然只是合理區，未到平。
這股質素是有的，但增長力略減，加上經濟中短期弱，都會令佢中短期弱，但長遠正面的。
2）平穩增長類，但增長力略減。
3）現價在合理區，可分注。如果你資金唔多，就等跌多D先。
4）可以，當中都是有質素的股票，可長線。盈富（2800）佔比可以較多。
另外，大市波動，最好一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18469：
你好龔老師，想請教下你，如有一百萬現金，該如何分配去投資才能在5-10年左右達到最大的收益呢？謝謝
龔成老師：
要睇你風險承受程度，如果集中在潛力股，回報當然最大，但風險又太高。
因此，我會建議你投資「平穩增值股」+「潛力股」。潛力股比例多少，就視乎你的風險承受程度，以及投資實力（因為潛力股要較大的分析技巧）。
平穩增長股，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
潛力股可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18470：
老師，有冇邊隻唔係太新、價又唔算升好多但很有潛力升的股票介紹可以入？施永青話太新的股票好難睇透，粉飾才上場好多，你贊成嗎？thank you so much!
龔成老師：
絕對贊成施永青的講法。
其實在我的股票班教學生選股中，都會要求企業上市年期，最好有2年，這是由於新股上市只要3年的財務數據，因此好難有全面的分析。
加上上市前一定會整靚盤數，所以往往要上市仍1、2年，先會見真章。
舜宇光學科技（2382）算是唔太貴的股，仍在合理區中上部，雖然不是爆升類，但有增長力，不過中短期就較弱。
------------------------------------------------
Q18471：
你好，我明白呀sir 教嘅係價值投資，睇長線，只要有價值就可不太理會中短線股價波幅。
但我想問問假如我覺得手持的股票或大市，因急升很多，估值佢會急跌回吐，我應否先行獲利？而獲利的錢應該放喺邊d 低風險或者避險嘅資產度？
以小米 1810 為例，我$10.1 買左3 手，見到股價條curve 愈拉愈直，我心有不安，覺得佢點樣升就會點樣跌，所以 24，25 蚊賣左2 手。
我都明白唔應該估 或者 估唔到後市；亦知道賣左就未必有機會可以係返合理價位買入，睇長線 計返條數都係一直持有嘅效果大d。
我自覺好矛盾，唔知道自己做得岩定錯。究竟係我心理問題、知易行難，還是我太想獲得最佳結果而自尋煩惱？
另外有個想法想問問意見。
唔好意思可能有d投機心態，
就係新經濟股唔太受疫情影響所以急升，但舊經濟股就受影響而落後大市。
雖然未有起息、我應否趁低價買入，然後等復蘇反彈追落後呢？
例如長和，已持1500 股
半年業績大致欠佳，請問是否仍具質素與增長？
又例如粵海 270 及 深高速，股價一浪低於一浪；業務穩定，但會否欠缺增值能力？應否換碼？謝謝！
龔成老師：
優質股是否賣出，有可能的，但如果是好優質的股，就算再貴，我都建議持有一定的數量，賣部分就得。
而最重要是估值，你唔好分析「近期升好多」「愈拉愈直」都不是重點，例如，一間公司值$1000億，佢由$200億的市值，升到$700億，現價仍然是平！
小米（1810）近期的確過在合理區，你賣出部分是可以的，但我建議點都有一定的貨持有。
你可能有選股能力，但未有估值能力，如果掌握這方面的能力，你會解決了心中的問題，在之後投資更好。
要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。
簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。
如果要深入計算，基本上要好仔細的研究企業，要分析好多財務數據用比率，先至有較完整的答案。
至於你上述所講的幾隻舊經濟股，你都可以持有的，你買入等經濟慢慢好轉，策略上是可以的。
你唔需要理中短期股價，佢地中短期業績差是正常的，你耐心持有就得。
------------------------------------------------
Q18472：
老師你好, 我都係投資新手 , 沒有物業, 現金5萬, 現在買左盈富基金($25.9/500股), 中銀香港($21.5/1000股)
每月可儲2萬, 打算用1萬月供股票, 5千供盈富基金, 另外5千就未有諗法
(以下股票都研究緊銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）)
想問下當我考慮時投資各股票時, 要考慮咩因素同埋投資比例要點先可以平衡?
今年30歲, 希望可以盡快財務自由
但知道自己風險承受心理能力不高
龔成老師：
現時你持有的，都是有質素的，可長線。至於現金$5萬，會建議你備用及等投資機會。
至於$1萬月供，做法至確，你可以長線進行就得。
盈富（2800）$5000無問題。
另外的，可考慮2、3。以你的年齡，可考慮平穩增長股+潛力股，而上述大多只是平穩增長股。
你要考慮質素、前景，是否適合自己。另外同一行業不能太多。如果你風險承受程度不高，建議港鐵（0066）是其中一隻，這股較穩健，另外1、2你可慢慢研究。
我會建議你增加多少少知識先，理財是長期過程，唔需要太過心急，可以多學習知識先開始。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18473：
龔Sir你好呀，我想問福壽園現價係米有啲貴，如果我想入一手先應該幾錢入好？
同埋小米今22-23蚊，買一手先值唔值得？會繼續回升嗎？
如果福壽園同小米簡一隻買先買邊隻好
同埋中生制藥，想買一手應該入邊隻先好
龔成老師：
福壽園（1448）現價略貴，$7以下才算合理價，不過，要見到不易，如果你資金多，都可以現價入少少後，等跌先正式入。
至於小米（1810），$18以下合理。中生（1177）$8以下合理。
等佢地跌到合理區先入，會較好。但如果你手上完全無潛力股，而你現金較多，小注投資再等跌正式入，不是不可的。
------------------------------------------------
Q18474：
你好龔老師點問175。
龔成老師：
吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。
但中國車市放緩、外來競爭、行業競爭加劇，都成為不利的因素，相信中短期仍會對佢不利。
股價由高位回落不少，除了反映過往處貴水平，現在回落至合理水平外，同時反映市場預期中國車市的不利情況。相信這股中短期股價仍會不利，但長遠前景仍在的。
現時價位在合理區中上部，但股價波動，如投資要分注，同時要長線投資，車市要慢慢才好轉。
------------------------------------------------
Q18475：
成哥 其實銀行股係咪最好唔好買，除收息，姐係如果給經濟加息對樓市有不利，變相佢都小左好多生意
同埋d公司好多都唔肯借錢，到時多左d人放係銀行，好快又會減息，帶動經濟向上？
有咩因素只會令銀行業獨升？冇既話後生真係買都唔洗買，純粹比老人家收息用？謝成哥
龔成老師：
銀行業的大環境，的確比過往轉弱，賺錢能力不及過往年代，所以，你只能預佢平穩增長，甚至只是收息，並不是高增長，但這刻不少銀行股的股價都算合理。
息差因素影響佢地盈利，而經濟活動少左，都會令借錢的人少左，加上當經濟差，自然多壞賬。
當然，我地分析時，唔好只睇中短期，要以長期的發展去分析。
整體上，銀行中短期都會幾弱，長遠會好轉，但不是高增長類別。
------------------------------------------------
Q18476：
老師，我買左中銀出的大灣區債券基金，主要投資大灣區政府機構所發行的證券或存款，BBB-級。 老師是否指其實買債券（產品）不如買收息股（資產）？
由於現時平穩增長股未在趁低吸納的好時機，及已放一部分投資在平穩增值股和潛力股，買收息股是否較債券好。如將所有投資都放股票會否過度集中。謝謝
龔成老師：
你所買入的，始終是「產品」不是「真財富」。
因為該基金所投資的，是「產品」」
產品不是不可以持有，但在比例上，我地會較為集中在資產，產品佔小部分已夠。所以，如果你分析完這個項目，見佢風險度能接受，同時本身有質素，作為財富配置其中一部分，不是不可。
如果你想追求較低風險，投資收息股是可以的。最重要是建立一個平衡組合。
------------------------------------------------
Q18477：
龔sir你好我係股票班舊生，見到醫藥股潛力的確係有，我睇左中生制藥同石醫集團，除左產品唔同之外，其他數據好似差唔多。有幾個問題想問嘅
1. 咁呢兩隻到底有咩明顯分別?
2. 我上中銀網睇中生制藥ROE，但我計黎計去都計唔到佢比個數，例如2019年9%，我用盈利÷ (總資產-總負債)，計出黎係6.7%。2018年仲誇張，47%，我就計到24%，我係咪有啲位計錯左?
3. 中生制藥派過紅股，想問你比的網係咪會調整返每股盈利同每股帳面值?定係要我地自己計? 因為我自己試過用佢比嘅數，市盈率用15-25倍，合理價係4.5-7.5，係咪同你計嘅數大致接近?
4. 聽講你遲啲出千萬富翁書，之前你出過1百萬、2百萬、3百萬富翁。其實我未睇過呢個系到，呢幾本主要有啲咩唔同?我都相信自己遲早有1百萬，想直接睇千萬富翁得唔得? 另外下年係咪有星期6進階班?平日夜晚好難預時間
龔成老師：
1）如果你見得我課堂講過，一些穩健型潛力股的特點，以醫藥股來說，我地見到這兩股，都有一定的規模，以及一定的產品組合。
佢地可以用已經賺錢的業務，去不斷開發新藥，這是最穩健的經營模式，加上經營活動現金流保持正數，都是利好因素。
2）因為當中有一些會計問題，例如你只用總資產-總負債，而你未扣除「小數股東權益」（第7堂有講過）。而一般來說，你睇佢年報提供的數據已得。
3）佢會調整翻的，但我唔清楚佢幾時先正式調整。而你計出的合理價，大致正確，反映你基本掌握了分析及估值的技巧。
4）講「致富」的，你直接睇可以的。
我應該會在2021年中，搞一次星期六的進階班。
------------------------------------------------
Q18478：
龔sir 你好 身邊朋友都話le個時期唔適合長揸d股 因為le兩年好可能會金融風暴
想請教一下金融危機會有先兆嗎 應該如何提早預防 你點睇呢？感謝
龔成老師：
要預測金融危機，是十分難的。就算好多金融的專家、經濟學家，都無人能預測到2008年的金融海嘯，只有少過1%的專家有提過下，但佢地都唔肯定。
所以，除非你身邊朋友是金融科的教授，或佢自己每天會用8小時研究金融與經濟數據。
否則，如果佢只是用一般的數據，只用了少少時間去分析，無可能會分析到。
金融危機一般會出現經濟過熱，以及負債過高的情況，但我在過往20年，都不斷見到有人分析幾時幾時會有危機，但最後都無事。
------------------------------------------------
Q18479：
老師你好，由於我長居於日本 收入全是日元 你會建議我用日文兌返港元作投資用嗎？
收入只靠老公個份 扣埋開支 只有$1000可儲起 由於從來無投資經驗 想由月供股開始 但長遠黎睇（日元兌港元）做法可取嗎？
只想儲啲錢俾小朋友將來用..
感謝
龔成老師：
如果你對日本的股市及企業有認識，其實可以投資當地的股票。或一些日本的股票指數基金。
甚至最簡單，是投資一些在日本上市的環球或美股基金，基本上長期月供，都能令財富平穩增長。
至於轉翻港幣投資，都可以。月供盈富（2800），但就要留意手續費。
------------------------------------------------
Q18480：
老師你好，剛買左你置業4部曲，我上年第一次買樓，買左元朗一個580萬樓花，370呎，但位置係二線地段
但因為想近屋企，想之後都買反元朗or屯門，想過左ssd後買屯門市中心（時代廣場，市廣場，華都等）但大部都30年樓
同睇你講過屯門既潛大不大，但以我人工之後幾年計過，買屯門負擔無甘大，有資金投資，定應該買細dd市區既樓，升值快d，如果無得簡既情況下，屯門，兆康，元朗
你又覺得邊3個地方升值潛力較好。謝謝
因為宜家新樓，位置不太方便，管理費又貴，睇你書提過，樓既大廈環境，設置可以唔太著重
如果屯門市中心既30年樓同兆康疊茵庭，邊個你覺得升值較好
龔成老師：
坦白講，元朗與屯門潛力都不大，不過如果你的生活圈在當區，就都可以，但就要明白投資價值不算高。
另外，唔建議轉來轉去，第一，元朗與屯門都是類似，你無明顯變化，唔應該轉。第二，你太多買賣會增加成本，對你資金不利。
其實屯門，兆康，元朗，你可以視為分別不大的地方，因此，你只要考慮自己方便，那個較平，交通方便，租金回報率較高，就得。
30年樓仍是可以接受的，無問題，只要維修問題不太大就得。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
