［少人講嘅肺炎受害股］是日估估下：新肺炎，重災區當然係中國，不用多講。但第二最多人感染嘅係邊度？（其實睇圖估到了）
1. 唔係對中國中門大開嘅泰國，甚至唔係香港—香港確診仲少過新加坡—但甚都唔係新加坡。而係，你估到了，鑽石公主號郵輪。60件，多過坡國。
2. 隻嘢而家泊咗在橫濱，但唔當係日本病例，日本自己冇計，世衞亦都冇，亦都好合理。咁當邊度？咁你睇《賭神》就知啦，「巴拿馬總統同我都有啲交情」，咁當然係睇下隻船邊度註冊。答案係，Port of registry在英國。但當然唔計落英國又幾合理，最簡單，咪計自己一個單位。世衞都係計Cases on an international conveyance
3. 又，我呢啲咁邪惡嘅，梗係即時睇股價啦。鑽石公主號，就係Carnival嘅，上市公司，紐約倫敦，仲係富時100成份股，大生意。五成孖劇些牙，龍頭。第二就係Royal Caribbean，兩成幾。第三係Norwegian Cruise，一成不夠。三間都上市公司
4. 咁你睇到了，股價梗係插啦，不過又講真，其實三間都唔算跌得多。今年高位都係跌一兩成左右—不過睇返，原來甚麼因航南航東航國航都係一兩成，同你以為血洗咁又真係唔同了。可能油價低都有啲關係。
5. 又講下，黃國英有排有寫郵輪股（都早幾年了），佢身體力行去幫襯。其實我都有諗過，幫襯，唔係買股。但你估下最後點解告吹？「你叫我幾日冇網上我會死的」。
6. 2012年聖誕，我在古巴，冇網上（係完全冇！手機冇，民宿冇，網吧都冇），好似戒毒咁流晒口水鼻涕，最後留咗幾日，返咗墨西哥。然後架機去到墨西哥，都未落地，我已經用漫遊（舊幾水嗰啲漫遊day pass啦），上到網好興奮。同行朋友話我係道友，戒毒幾日又去吸毒。或者好似林振強戒煙記咁（http://bit.ly/2OEUYcl），佢係阿力士，應該成部電話掉畀我，「上飽佢啦，死道友」
7. 又不過，而家聽聞，啲乜乜郵輪呢，係可以上網的，拿，咁又唔同！
8. 但都係要講，其實未有肺炎都好，郵輪都係播毒溫床。特別係腸胃炎，隻「名人無極號」Celebrity Infinity都爆過三次，同一隻船喎！下水都未夠廿年。
9. 又，呢個 Celebrity ，以前叫菁英郵輪，我係睇咗做耆英郵輪的。以前擺明係老人家嘢，係近十年先有啲改變。
