「第十一屆國際文化美食節」喺漁人碼頭開鑼喇喂！身旁嘅妹豬向你抱怨過冇乜新地方消遣嗎？一於10月4號前帶佢嚟打個冷啦，今年嘅參展商家有成101個，9成以美食為主軸，絕對可以帶佢嚟chill下，繼而用琳琅滿目嘅美食塞住佢把口！
我自己就對呢個活動特別有情愫，因為曾經參與其中友情客串睇過下檔，眼見無論係進駐嘅商家定表演項目，都一年比一年剎食精彩，檔口嘅覆蓋範圍亦更廣泛，可以過下癮喺唔同區域度左撲右撲美食㗎！
泰好味 - 必入手椰子雪糕同三色芒果糯米飯，未入口揸住咋，身處曼谷市集嘅錯覺即刻擴張，令人神往！
南洋咖啡 -除咗個開賣首20份有一蚊優惠嘅招牌咖椰多士，法式燒蛋多士都好值得試，蛋香味將減肥計劃同心靈一次過攻陷晒。
家友翅 -索價$23 嘅炸雞髀霸氣十足，竟然差啲可以同我塊面嘅尺寸匹敵，真係唔惹小，海螺碗仔翅由素翅上陣，一翅都唔食嘅你可以say yes。
半邊檸 - 食完燒烤戰鬥力減半，即刻入手返杯半邊鮮橙綠茶箍煲先。清新嘅綠茶中滲透住鮮燈嘅果香，酸中帶甜，𣊬間將滯膩感平息咗！
喜瑪拉雅屋 - 即製即拋即撻即烤嘅香蕉薄餅，酥脆嘅餅皮內收納咗滿滿嘅香蕉餡料，加埋煉奶嘅甜蜜助攻，自己諗啦！
另外重同班黑洞foodies們掃咗由澳義雪糕、眷村阿嫲同碼頭大排檔等主理嘅作品，再寫落去恐怕要日落，一於拉大隊嚟現場體驗一下啦，話晒又有三個鐘免費泊車！
Macau Fisherman’s Wharf 澳門漁人碼頭
國際文化美食節
【第十一屆國際文化美食節】
時間：25/9至4/10；下午3:30 - 晚上10:30。
地點： Macau Fisherman’s Wharf 澳門漁人碼頭
南洋咖啡 Nanyang Kopi
The Himalayan House
Half Lemon 半邊檸
澳義
#第十一屆國際文化美食節 #ICFF_MACAU #macaufood #macaufoodie #macao #macaofood #澳門obxxob #foodporn #instafood #澳門美食
