【龔成問答信箱】（Q13781-Q13800）
Q13781：
我想請問下呢 潛力股佔成個組合既一半係咪已經太多？如果較進取大部分錢買入潛力股會唔會得不償失？
龔成老師：
潛力股要佔股票組合多少，好睇3大因素，第一，你的年齡情況，如果是年輕的，可較多，年長的，當然不會多。
第二，風險承受能力，每個人不同，能承受較多風險者，當然潛力股的比例可較多。
第三，你本身的投資實力。因為分析潛力企業，要求你有較多的投資知識，因此，若果你的知識較高，潛力股比較較多無問題。
如果你較年輕，本身都有知識，懂得分析企業質素、企業估值，潛力股佔你組合一半，可以的。
------------------------------------------------
Q13782：
我想問強積金個都我應該點樣分布，因為我之前一直都係填100%保守
龔成老師：
強積金，其實模式好簡單，你只需要用你的人生階段去分配就得，唔會炒炒賣賣，唔會成日轉。即是年輕時進取，中年時平衡，到接近退休時就保守。
強積金唔洗轉來轉去，只要簡單分配左，然後慢慢按年齡而調整就得。我自己過往多年，都是100%恆指。
過度保守，會令你輸比通賬，以及輸比手續費。
------------------------------------------------
Q13783：
老師你好，懇求指教
手上持有
#5 800手 $59.95買入
#52 1000手 $25.51買入
請問你點睇#52 跌了很多，應該守著嗎？
另外，#1177 應幾多錢買入是合理區
謝謝
龔成老師：
我地繼續持有一隻股票與否，重點是企業的質素，買入價只是心理因素，因此不要被買入價影響投資決定。
見你投資的股票，都是優質的，基本上可以一直持有。
匯豐（0005）有質素，但賺錢能力的確比過往年代減弱，現時只是一隻收息股，你可以長線收息，但就唔好對股價有太大期望。暫時可以守，但唔好加注。
至於大快活（0052），都可以持有，不用擔心。但香港的社會運動，以及員工等成本增加，會對佢有一定的影響，所以中短期會一般，長線則仍正面。
至於中生製藥（1177），有潛力，但現價略貴，$10以下才是合理區。
------------------------------------------------
Q13784：
龔成老師你好，本人27，希望30歲儲到50,60萬結婚用，今年一月開始月供股票。
現在月供
0823 $3000
1211 $2000
另外持有
1手2318
3手0003
2手0405
仲有5,6萬現金
到時結婚會賣出部分股票套現，以持有3年來說，請問依家投資既股票正確嗎？
另外長遠黎講我知道複利息 需要利用埋股息滾存，但現在月供股票出既股息唔多，只有幾百蚊，不足以買1手，咁應該點做？
先謝謝龔成老師
龔成老師：
3年算是一個中長期投資，勉強都可以。
因為我地投資的原理，就是將資金投入企業，然後等企業成長，但企業成長要時間，因此長線投資會更好。
你上述所選的，都是有質素的企業，比亞迪（1211）是潛力股，但我擔心3年佢未必能見到真正的前景，因此，你要自己衡量翻，如果3年後要繼續持有比亞迪，未能套現，資金上是否無問題。
至於其他股，無問題的，你可以保持投資，到時賣出相對較貴的股票套現。
但你都要留意，股市始終有風險，因此唔能夠全部投資股票，你要有部分持有現金，否則有可能影響了你的計劃。
至於複息問題，累積財富初期，股息少是正常的，你可以先儲起這些股息，到一定的數量後，再投資股票，咁就得。
------------------------------------------------
Q13785：
你好，唔係好識野，想請教下，我睇六福的股價圖，佢2008年個陣個股價係-8蚊，其實係咩意思？
龔成老師：
一般的股價圖，都會因除淨而作出調整的。
例如現價$20，佢派息$1，明天除淨，佢明天的股價會自然地調整至$19。
股價圖為左一致性，會將過往的股價，都下調$1。因此，經過多次派息，就有可能出現負數的情況。
------------------------------------------------
Q13786：
成老師你好 現在我月供兩萬蚊 分別在以下股票 騰訊8000 煤氣4000 地鐵4000 港交所4000
已經持續了超過一年 我打算會供多起碼三至五年 你認為這個比例合適嗎還是作新部署
我不想講供太散 四隻為上限
請指教謝謝你
龔成老師：
上述都是有質素的股票，你可以保持月供。
騰訊（0700）增長力無過往咁強，但長遠仍有質素，你可以保持月供。雖然現價唔算特別平宜，但以月供作策略，長期進行，是可以的。
其實，比較平衡的策略，就是減$4000騰訊，然後加上一隻盈富（2800），唔會特別散，但就能令組合更為平衡。
保持供上述的股，基本上無問題，5年以上較好。
------------------------------------------------
Q13787：
我有努力工作10多年現有太約2,000,000現金，應該如何部署投資能夠早日財務自由，希望老師能夠指點迷津
本人還有持有一個港島區車位，大約1,000,000，但沒有物業在手，應否現在入市買樓收租，還是作其他投資比較好請老師給些專業建議，謝謝老師用心分析。
龔成老師：
現時你有車位，算是有固定資產，因此不用太心急去追物業。
之前政府出招放寬左按揭，會令樓市短期向上，但不建議高追，香港的社會運動，將會影響經濟，這會令樓市在短期升完後，回歸基本面，即是會向下，你等這時，見到有較平的盤才買，見唔到就算。
長遠來說，當香港社會運動過去，樓市又會慢慢向上，所以你都有投資物業的價值。
所以，你這刻可以留有一定的現金，部分資金可分注投資優質股，平穩增值類就得，盈富（2800）等類別適合你的，同時等上面的策略。
------------------------------------------------
Q13788：
Sir,大吉利是但同時係投資嘅問題，早前有親人離世，才發現了骨灰龕位都會升值，請問這算不算投資的一項？算是資產嗎？
因為香港的大部份骨灰龕場要重新發牌，獲正式發牌的位又是貴一倍以上，而且又算是「有需求」的東西。
龔成老師：
骨灰龕當然是一個資產項。
其實，土地是一種重要的資產，這點由古至今都是，因為有土地就可以有不同的用途，並能因此而為持有者，產生經濟價值。
現時，土地產生了多種模式，都是有一定的資產價，所以，你上述的方向正確。
但再一類資產，都有當中的需求、發展，你一定要仔細分析。投資骨灰龕並不是我的強項，你如果投資，之前一定要經過仔細研究，唔好單單從過往的價格就認定這刻一定有投資價值。
------------------------------------------------
Q13789：
Sir，分析完最新六福年報，見到佢今年經營現金流負數，由於佢大量買入存貨，但咁岩今年遇正貿戰，好既係睇得出佢好進取，壞既係可能令佢有存貨積壓，不過都見佢將來都想發展供應鏈解決依個問題你點睇？
而且佢自由現金流都因為資本開支大左令佢有負數，不過依樣係會計上既計法令佢負左，我覺得冇乜問題
依家個合理價睇佢有機會發展電商而且快速拓展中國市場，所以我預計佢合理價位約HKD 25 - 29
龔成老師：
佢今年的確有存貨積壓的問題，其實早一年，唔少零售企業都預期零售市道慢慢向好（因為之前有平穩不差的情況），所以入多左貨都是正常。
但其後發生貿戰，更因為人民幣貶值，令自由行消費力減弱，這都令六福（0590）出現上述情況。
到近期的香港情況，只會令問題更大。
上述種種因素，都反映六福面對一個不利的經營情況，中短期不會樂觀，不過，六福有能力捱得過，第一，佢財務穩健，現金足夠，流動比率合格，因此不擔心佢會有好大問題，只是中短期的。
第二，佢不少存貨，都是一些有價值的項目，例如黃金，這類存貨比起其他零售行業的存貨，有價值得多，因為不會因為賣不出貨而價值大跌，所以不用擔心。
合理區可以再調低返少少，以反映這企業面對的中短期風險。同時中國經濟轉弱，對佢中國發展都有影響。
------------------------------------------------
Q13790：
老師，問多一點，如果用加按的錢一百萬，怎樣投資較值博？本人今年已45歲了
現在連準備退休的錢都無 還好有一層已供滿的房
是正資産
我用了大約幾十萬買了了1383太陽城 平均價约1.95 点
我認為它是一隻好有潛力股票
Sir 你認為1383太陽城 假設長期持有 大約3至5年 會否
升到像3918 金界 差不多的價位 約10元 因為大概兩者業務相同 而1383 更有澳門業務支持
謝謝老師百忙抽空解答
龔成老師：
你45歲，財富仍有增長的能力，但由於資金是加按得來，因此，我會建議你投資「平穩增值股」+「收息股」，平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
如果你每月收入減支出有剩，餘下的才可以投資潛力股。
至於太陽城集團（1383），我有少少保留，因為這股多年都有虧損，加上核數師的意見中，出現了修定報告，即是說，核數最初對財務數據感到有古怪，與這企業溝通後，可以話最後無問題。
雖然這企業在財務數據上無問題，但就暗示有點古怪位，因此要小心。
考慮到上述這兩個因素，唔建議大注投資，你小注持有算了。
金界（3918）壟斷左柬埔寨金邊市場，唔好直接比較。
------------------------------------------------
Q13791：
老師，我想問3988及2388，點解你話3988收息較好？
2388收息0.545 3988 收息0.184
是否數學問題 用差不多金錢
可以買到4手 3988
派息是 0.185 x 4000? = 736
而2388 一手500 , 派息是500 x 0.545 = 272.5
所以說3988 收息比較好
龔成老師：
我地投資，不會只集中一年的財務數據。
要分析過往5年的情況，同時預測將來的情況。
上述兩股都是有質素的股票，但我地定義一隻股票是「收息股」時，佢就要有這些特質。例如佢過往的股息要穩定，派息比率、派息政策穩定。
同時，我地希望佢將來的派息都穩定。
一間企業點解能持續派息，就是由於佢的業務穩定，不斷有盈利，令有足夠的資金派息。
中銀香港（2388）都是優質股，同中行（3988）一樣，都可以投資，收息。不過在純收息的層面，我地會選較穩定的，股價較為穩定，預期派息較為穩定，因此，這方面中行略勝。
------------------------------------------------
Q13792：
龔生，小弟手上可投資的資金是36萬；已買左6110滔博（體育股）10.2買左10000股；仲想買1521 CRO方達控股（聽聞佢搵得幾多）、6826昊海好似回歸A股上市、1951錦欣生殖。
用呢四隻建倉做一年既組合，建唔建議？但好似都係估值很高？是否嫌貴？因為我覺得呢四隻好似升既機會較大，謝謝
龔成老師︰
你先要明白投資股市就如投資企業，我地要分析係企業本質和長線發展。一些傳聞消息或者與企業本質無關的事情，我都唔應該理會太多。
滔博（6110）、方達控股（1521）和錦欣生殖（1951）都是上市不足一年的新股，業務上，或許有吸引力的，不過，我一向都新股半新股都無興趣。因為真實面要慢慢先見到，加上佢股價十分波動，估值困難，只建議小注，同時你要明白當中的風險。
昊海（6826）主要於中國從事製造及銷售醫用透明質酸及生物製劑、生物工程及藥品研發，以及提供相關服務。回歸A股跟企業本質無關，絕對唔係買入一隻股票理由。
此股質素算是中等，佢生意有增長，但唔算強，加上盈利唔多，只有數百萬。此股只宜小注，不宜重點持有。
------------------------------------------------
Q13793：
老師您好，你覺得深水埗區40年左右的單幢大廈(有電梯)有投資價值嗎？
龔成老師：
價值當然無大型屋苑咁高，但如果樓價有一定的拆讓，都可以考慮的。
首先，深水埗區要睇翻地點，有些地點可能有少少雜，你要留意四周的環境。如果你打算投資，一定要了解該大廈，一般的租客是那些人，會否品流較為複雜。
另外，40年樓，要開始關心維修的問題，當中的成本如何，你要小心睇睇樓宇現時的通告，潛在的不利因素。同時，你買入後，如果你10年後賣出，到時已經是50年樓，下一手買家要考慮的因素更多，你的物業有貶值的可能。
你可以參考同區類低單位的市值、租金收入。以及銀行估價。要處較平的價格才會考慮。
------------------------------------------------
Q13794：
成哥, 又想問下, 美股你又點睇? 以您的價值投資法, 美國有很多世界性又穩定的產業, 近幾年亦爆升
如FACEBOOK, 微軟, apple, Neflix, VISA, 具實力又冇乜對手,長線投資好似仲吸引, 而且美股是一股股買, 不是一手, 門檻好似易D , 又點睇? 謝謝
龔成老師：
美股都有好多值得投資的企業。由於我地投資，就是要將資金投入在優質企業，因此，美股都是可選的股票。
不過，我地投資，只會投資自己熟識的項目，所以你唔可以盲目投資，一定要自己了解，分析好佢地的財務報表後，才可投資的。
你上述所講的，基本上都是有質素的股票，但你仍要仔細分析，同時了解下佢地的平貴才決定投資。
------------------------------------------------
Q13795：
我睇你本書，唔知係咪我理解問題，有錯別字，提翻你。
龔成老師：
錯別字有點唔好意思，其實我同出版社，都會翻睇本書2次以上，先會出街，但始終一本書去到10萬字，總會有D錯別字，唔好太介意。因為要去到好完美，就要花好多時間。
雖然我會盡力睇，但希望你都明白一點，如果我要為最後的1%，付出了20%時間，點解我唔利用這20%的時間，去寫多另一本書，咁樣對社會反而有更大的貢獻。
所以好多時，我都唔會太理會D細節位，寧願用時間，做多幾樣野，讀者得著會更大。
多謝你的提醒，我同出版社會盡力注意翻。
------------------------------------------------
Q13796：
其實我想問呢，我覺得你同巴菲特既概念一樣都係以價值投資，長期持有，但有一個問題我就到而家都唔係好明。
因為就算長期持有係咪應該要搵一個合適嘅價位先買入、還是系憑自己感覺？
龔成老師：
首先，價值投資法，一定是王道，我地買股票就是買企業。
我地進行的，就是「儲優質企業」，累積優質資產的過程，因此，投資優質股，長線投資，不斷累積，是大前題。
我地當然會分析企業的平貴，所以我地先要為企業進行估值，點解在我的股票班中，要用近2堂去講企業估值，就是這個原因。
因為我地要分析企業現時的平貴，去決定入唔入這股，點樣入這股。
------------------------------------------------
Q13797：
你好龔sir。我屋企人現時有60 萬，諗住2 年後攞黎裝修屋企的。想問下有無一些平穩增長/ 收息股推介？
如果想短時間內得到一筆回報，你會推介做股票掛鈎嗎？謝謝
龔成老師：
由於2年不是一個長年期，因此增長有限，同時當中存有風險，因為無人知你到時賣出股票時，市況怎樣。
我會建議投資穩健收息股，雖然回報不算強，但由於該筆資金你地本身有用，因此寧願減少回報，都不希望你冒過多的風險。
所以，唔希望你太急追求回報。
至於做股票掛鈎，其實這是變種的期權，不是不能投資，但你要明白，當中的策略，其實是回報低風險高的項目，投資價值一般。
------------------------------------------------
Q13798：
老師，1266可以入嗎？
上望幾多？
另外，3681 $ 5.4有貨
應該要止蝕離場嗎？
唔該
龔成老師：
西王特鋼（1266）業務波動，同時盈利近年有大幅下跌的情況，雖然股價跌左好多，但當實質業務轉弱時，投資價值都會減少，因此股價跌不代表平左。
這股跌好多，現時估值不高，是唯一的值博因素。這類股，你可以當小注博下，但卻是有風險的。
中國抗體（3681）這類新股，好難分析，佢係香港的生物製藥公司，從事研究、發展、製造及商業化免疫性疾病療法，主要研製以單克隆抗體為基礎的生物藥。
風險高，可能回報大，但現時市值都成幾十億，其實唔算特別平宜。如貨多，要減，這類股，當小注博下就算。
------------------------------------------------
Q13799：
龔成老師，你好：我是來自澳門的讀者，今年9月時看了你的80後百萬富翁，獲益良多。同時都開始依照著書中所說的去做，上個月剛好還清所有卡數，目前處於純儲蓄的階段。
之前見你分享了一位讀者的個案，寫道他用了10個月的時間就存到10萬；看到他的收入跟儲蓄比例，對比自己的情況，令我有點疑惑，不知下一步該如何做。
我現時收入15,000（25歲）
每月的必要支出：學貸$1,710，房貸$6,700，退休儲蓄保險$1,558.39，危疾保險$2,832.8/3 months
月儲：2,000-3,000不等
現時儲蓄：16,000
我有以下疑問：
1. 退休儲蓄保險應否取消？因為想再買醫療保險，但我認為我已無法再額外負擔一筆費用。
2. 我現時將16000的儲蓄購買銀行的短期理財產品，基本上唔會蝕本金，不過三個月最多賺幾十蚊。我應該繼續這種方式嗎？
3. 書中有說到盡可能都不要刷信用卡，刷了都要盡快還。因此我想知道，假如我今個月錢已剩餘不多，但手機已經開始失靈，這個時候應該是等錢存到夠7,000左右再買，還是這個月先用信用卡/儲蓄先買了再說？
4. 月供股票的概念：買入第一筆→每個月供(一直持有)→收息→買入第二筆→.....一直循環直到企業不再優質就賣出。
所以這個股票收的息就等於我的另一種收入，我可以用它再買入股票或者花掉或者儲夠多就可以提早退休。請問我這個理解是對的嗎？
感謝老師解答我的疑惑。
龔成老師：
1）退休儲蓄保險、危疾保險，都是理財的其中一部分，我地進行理財，要建立一個平衡組合，攻守兼備，所以，保險類產品，在我地理財中，都有一定的作用，但就唔需要太多。
當我地建立了基本的防守後，之後就要集中力量去進攻。
所以，你保持現時的金額就得，唔好再加大保險。
2）留基本的現金，作為流動資金是需要的，你預$2萬作流動，但餘下的，就要開始進行投資。
3）不能因為這原因就用信用卡。你要習慣儲蓄消費，你試試買一些較平的手機，又或試下整翻佢，要盡用你身邊的所有資源，唔好太快比籍口消費。
4）對，你可以這樣理解。
不過，你年輕，我會建議你這刻投資有增長力的股票。
------------------------------------------------
Q13800：
你好！我想請教龔老師，766中盈有意認購一間科技公司股份，我想問是否有前景和可否買一點做長線
另外，可否教我如何分析這公司的優劣。
期待你的回覆！
龔成老師：
中盈集團控股（0766）年年虧損，加上幾年前核數師的意見曾出現修定情況，反映財務數據有點古怪，這類股，本質無投資價值。
至於收購的科技公司，其實你可以上港交所的網找到資料，中盈已經出左通告。收購「互聯智慧」，這是一間提供「5G 智慧燈桿」規劃與建設解決方案的綜合服務營 運商，但由於未見有詳細的財務數據，無法分析這次的利弊。
只可以話，這公司本身要小心，至於發展，存在未知數，只可以話有危有機，唔好盲目睇好。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
