進入劇本後（下）
上集：https://bit.ly/3diiKVg
之後我欠咗好多債，過住充滿壓力嘅生活。
劇本寫到呢度就完咗，可惜，我依然係女主角，冇穿越番去。
雖然唔再有劇本控制我，但我嘅生活，就係應付女主角嘅爛攤子，奇怪嘅外表、高壓嘅債務……
我好不容易過完女主角嘅一生，終於返去現實世界，做番一個冇負債嘅編劇。
我有啲迷茫，穿越去劇本入面，到底係夢定係現實呢？
我搖搖頭，唔再諗啱啱嘅事，開始寫新嘅劇本。
呢次，我嘅劇本更加有深度。
故事係講一個女仔，自細喺貧窮嘅村落長大，係窮到食唔飽、著唔暖嗰種。
佢努力讀書，憑住智慧同善良，最終成為一個鄉村教師，令全村人都識咗字。
可能你會問，女主角又聰明又勤力，點解最大嘅成就只係咁？而唔係發家致富，踏上人生巔峰？
呢個就係劇本嘅中心思想，唔係所有人都可以有驚天動地嘅成就，太多籍籍無名者，戴住沉重嘅枷鎖前進，可以行到呢一步，已經用盡所有力氣。
我寫完呢個劇本，自覺比上次更有深度、更有水平，但上司都係唔滿意。
然後，我再次穿越成為女主角。
嘩，我直頭忍唔住講粗口，穿越唔係偶然事件嚟㗎咩，點解我穿完又穿？
呢個劇本雖然係好結局，但對我嚟講，仲痛苦過上次做醜女。
上次主要係精神上嘅痛苦，加埋整容嘅痛，呢次係生活中每分每秒都痛苦。
呢度冇冷氣又多蚊，初期仲連飯都食唔飽，後尾算係食飽飯啦，但啲飯真係好難食，逢年過節先可以食肉……天啊！
哪怕後來做到鄉村教師，生活質素都比唔上穿越前。
好不容易過完一生，我返去現實，即刻買咗個快餐，大啖食肉，淚如泉湧。
食完快餐，我馬上開筆寫下一個劇本。
呢次嘅劇本只有一個主題：爽！
女主角又靚又有錢又有才華，所有人都愛佢，包括富甲天下嘅男主角。
男女主角產生過少少誤會，最後都解開晒誤會，過住幸福奢華嘅生活。
既然我要穿越到劇本中，我冇理由再虐待自己，梗係點樣爽點樣寫。
同之前一樣，我將劇本交畀上司。
不過，呢次上司非常欣賞我嘅劇本，並決定開拍呢套劇。
總之，我都成功穿越到劇本中，成為贏咗起跑線，贏埋終點線嘅女主角。
過完一生之後，我穿越番現實，真心覺得好爽，全身嘅毛孔都在歡呼。
我當然想繼續爽，我坐喺電腦前，開始構思下一個劇本。
本質要同上次一樣，唔駛有深度，有少少唔合理都唔緊要，最緊要爽……
諗到呢度，我忽然明白咗一件事。
點解我寫嗰啲美好到虛假嘅劇情，就大受觀眾歡迎；寫有深度嘅故事，就連上司嗰關都過唔到？
因為大部份觀眾，就同要穿越嘅我一樣。
我哋唔係追求深度，我哋只係想爽。
平時嘅生活已經好現實、好殘酷，我哋只係想放鬆吓，喺美好嘅劇情中獲得一啲力量。
我哋渴望嘅，唔係真實，而係真實中缺乏嘅美好。
或者，終有一日，我會寫番好有深度嘅劇本。
但無論我寫嘅係乜嘢，我都會明白，需要美好嘅幻想並唔可恥。
人需要深度，都需要放鬆。
再有深度嘅人，都抵受唔住，廿四小時都過得好有深度。
－完－
將專頁設定為「搶先看」/ "See first"，最新故仔馬上睇！
今次到我取西經：https://goo.gl/NbLzfF
染髮後穿越：http://bit.do/eNois
#短故 #短篇 #小說 #陳美濤 #廣東話 #粵語 #tomatochan #進入劇本後
致富經粵語 在 (粵)發財致富的秘訣(粵語有聲書)又名保富法 - YouTube 的推薦與評價
... <看更多>