【淆底慎入】
見上次同大家分享套《1BR》（中譯：奪命公寓）既反應理想，今次又同大家分享下我尋日睇既一套《女鬼橋》。
首先，套戲係講國語既，不過唔係大陸片，係台灣片。算我個人孤陋寡聞，又或者係我個盒子未見過世面，台灣鬼片真係比較少，一般都係美國、泰國同日本多。美國傾向殺人狂果type，例如《Scream》，泰國當然係貪佢邪，而日本既我覺得係最好睇。
今次套《女鬼橋》既劇本係建基於台灣東湖大學既傳說。你知啦，大學不嬲都多鬼故。而呢個即係關於一道橋，橋側邊有12級樓梯。而如果你响半夜去行既話，你會發現到第13級；呢個時候你唔好向後望，否則就會俾隻女鬼捉住！而呢隻女鬼，就係好多年前約左男朋友黎橋度私奔，結果男朋友無赴會而佢跳橋死既。個故事就係講响四年前有五個學生黎靈探結果離奇死，發生咩事。
以我既經驗，好睇既鬼片最忌係見到鬼既。或者咁講，其實隻鬼出現係好難避免既，但係出現既時間最好越少越好。疑神疑鬼既恐懼，永遠恐怖過見鬼。因為當你隻鬼出現到周圍去追人既話，通常都會變成笑片收場既。至於呢一套……嗯……其實真正見鬼都係最後果10分鐘既啫，我會話：接受到既，再多就唔好喇。
但其實呢套戲有咩咁好睇呢？係佢條橋（我唔係講條「女鬼橋」，係佢既橋段呀）老實講，鬼片都要有劇本架，唔係話猛咁影住隻野走來走去就兩個鐘加嘛！而佢呢條橋呢，我大膽講句：佢個結局係會令到你「下？係渦！乜原來咁架？」，有驚喜！你有無唸過睇套鬼片都會想翻睇第二次黎搵返d伏線架？呢套就會喇！
詳細我唔講喇，費事劇透，你有興趣就睇啦！又如果你睇完之後，好想一次過重溫晒所有伏線既話，你可以睇呢一個影評，佢講解得超透徹（https://youtu.be/ZW2mpYXVQsg）
#恐怖影評 #女鬼橋 #TheBridgeCurse
