話咁快，#孤毒遊東京系列 下集就結束咗。尋日下晝返到香港就立即開工，返番現實世界嘞。
大家可能會問點解我出trip期間冇乜update呢？係因為攰。每日都要搵節目畀自己，早出晚歸，返到酒店已經散散哋；今次去咗幾個遠些少嘅地方，等遲下有時間會喺度同大家分享返。
言歸正傳，我想講嘅係，今次我買咗幾架四驅車返嚟。
係，其實又係駛錢買番啲童年回憶。勝利者、摘星者、地平線，細個好想擁有，大個就買嚟心理補償。好多人都話點解唔喺香港買呢？首先，喺香港實在冇幾可去行模型舖；第二，一個人喺旅行嗰陣購物慾會寧舍高漲，好容易等駛唔等駛買一大餐。所以我買呢啲四驅車除咗因為自己真係鍾意之外，更加重要嘅就係用嗰一百幾十嚟滿足咗自己個購物慾；購物慾滿足咗，就自然唔會再亂駛錢啦。用一個銀碼比較細嘅消費嚟阻止自己唔覺意駛大，呢招其實好work。(寫完出嚟先覺得呢個簡直係用嚟買玩具嘅天才理由，下次試下同你女友/老婆講)
都既然買得番嚟咯，咁當然要搞得佢靚靚哋啦；就咁貼貼紙太齋，上埋色先係王道。所以，今日下畫我專登揸車過海去旺角，去買模型油。
成廿年冇玩過呢啲嘢，個心情實在好鬼興奮；之不過到真正身處喺一個全部都係著校服𡃁仔嘅地方(模型舖)嗰陣，就實在無可避免地有幾毫子唔自在。
所以 -
店員：「先生搵啲乜？」
我：「我想買模型油。」
店員：「油啲乜㗎？」
我：「我唔識㗎......我其實想幫啲細路仔油四驅車。」
店員：「扮咩吖，我有睇你ig story，自己玩咪自己玩囉，怕乜醜啫。」
買模型油搞到好似買咸碟咁🤦🏻♂️
有啲面懵咁行出間舖，去停車場攞車(真嗰架)走人；出閘嗰陣，發現泊車仲貴過堆模型油。
嗯，同自己講，其實所有嘢都係為咗避免自己亂買嘢啫；以老人家嘅理論，保得住份大錢，跌番些少出嚟，應該嘅。
#四驅車重光計劃
#童年回憶
買模型油 在 成功將12 支模型油從正常途徑由香港寄到英國 - Facebook 的推薦與評價
買匠鴨嘅時候已經決定沙煞比前面一定要擺返馬沙專用機體，所以12月尾日本之旅其中一個目的係買返自己冇嘅機體，依家買返魔蟹同紅勇士，另外自護號買咗就黎一年仲山積 ... ... <看更多>