【點解要政治正確】
就由我擁有過嘅焦慮症變抑鬱症厘啲精神病講起，為免誤會！
由香港去到英國，無論响邊我最唔能夠習慣嘅就係嗰一堆政治正確嘅稱呼或者名詞。世界上有好多原本存在多時嘅名詞，本來無褒或者貶嘅意思。就正正因為大家心底心處有或多或少嘅標簽，就要改個自以為好聽啲嘅名。例如，精神病裡面分咁多關於情緒變化出黎嘅病症，點解係要統一咁好聽叫「都市病」呢？
我講過因為我嘅性格，無論工作或者興趣娛樂都比較有要求。响香港生活去到人生某一點，發覺其實自己等如社會上一粒塵無分別。威就一定唔會最威，慘又唔敢話自己慘（不過都係捱）。响香港做咗一個偽中產，唔醒覺本來係無問題嘅。
大家日中响FB都見唔少嗰啲被朋友稱之為「乜哥，乜少，乜爺」，久唔久都互相自high一番。當我問下自己換間多一間房嘅樓夠唔夠錢，買多架兩座位養唔養得起，下次帶隻貴過五十萬純鐘意但唔保值嘅錶（無火柴喎！）捨唔捨得？自問當日自己做唔到，長遠都唔得。咁其實我真係要啲乜呢（認真思考生命的意義是會儍的，勿試）？忽然間醒晒，問題就出現。
人就開始焦慮，無原無故地無內容咁好擔憂（去到驚嘅地步）。可以無原因，無時限，無理由。個觀感可以去到心跳加速，頭痛，手震，全身無力。其實問題係出於腦裡面少咗或者嚴重嘅就用晒一種物質，所以千其唔好以為同人傾下計，信下教，諗少啲就可以處理到。就等如傷風感冒唔食藥，係無可能控制自己唔咳同流鼻水同一道理。
講到好好聽以為厘啲「都市病」好平常（根本就係實實在在嘅焦慮症）。唔好好處理的話，好易明白就會變成點。咪抑鬱症囉，嚴重嘅我估唔洗講啲悲劇。我就比較「好彩」，全身機能忽然間有一日熄機分幾鐘咁多囉。無乜嘢嘅！如果無人發現嘅話，醫番都嘥藥費咁囉。
其實上面嘅嘢，係醫學上本來都唔算難解決。偏偏好多人就係要政治正確，改啲好聽啲嘅名。結果好多人咪覺得係小問題，「開解下」就會無事囉。咁點解唔將cancer改個好聽啲嘅統一名稱呀？咁咪可以當係好似好小事咁囉！我從來都唔會否認，曾經係重度焦慮症同抑鬱症「精神病患者」嘅喎！最緊要係面對同解決，而唔係要聽好話同逃避。
所以我討厭一切政治正確嘅名稱，例如都市病，認知障礙，傷健人士，甚至跨性別人士，香港女生，香港男士，厘啲古靈精怪懶動聽嘅名稱。我覺得根本啲人响心裡面有既定嘅偏見甚至歧視，先去試圖包裝掩飾。當大家心裡面對件事係零重量嘅，基本上連諗多餘（即係平常事啦）。結果我從開厘個page到今天都係有嗰句，講嗰句。如果係有偏見嘅，我完全唔會掩飾。因為我相信只要無真正嘅歧視或者出言侮辱，大丈夫，無事不可對人言。講完，悶靚大家！
#自己講自己
#可以去到盡
#勉強做到一樣半樣
#做到又如何
#咪又係送錢比人洗
#繼續都係粒塵
#幾粒塵互相比較
#留番去英國好過
#熄機兩分鐘都試過
#重有乜嘢唔夠膽
#所以面皮幾尺厚
