心態決定命運
一直我都好強調運動人生 除咗可以健康啲靈活啲外
其實運動好影響個人心態 尤其係懷孕期間
喺世俗人嘅眼光 覺得孕婦係受保護動物
有得坐唔好企有得瞓唔好坐
唔好攞重嘢唔好流汗唔好心跳加速
當然充足嘅休息我係絕對認同
我自己都好鍾意訓晏覺😬
懷孕令媽媽作出好多犧牲
面對身體上面各種嘅不適都逆來順受
無論順產或開刀都勇敢地將新生命帶嚟呢個世界
的確係應該受到尊重同愛護
所以身邊嘅人對自己好啲都應該嘅
但媽媽請你千萬唔好過分陶醉呢份溺愛
如果你有一日發現有人冇留意到你係大肚婆
你藐視嗰個人因為佢冇讓座俾你 咁你就要留心啦
美好嘅事開始變質 你開始take it for granted
開始唔識 appreciate 身邊人對你嘅好
開始覺得對你唔好就係罪惡
呢種心態帶到去BB出世後係非常危險
因為當你生完後
身邊人嘅Focus難免會變咗點樣可以照顧好啲個BB
你可能開始覺得身邊嘅人都唔重視你 忽略你
冇人注意到你好辛苦甘照顧BB
冇人注意到你嘅犧牲 欣賞你嘅勇敢
冇人關注你身體上同人生上嘅轉變
呢個好可能就係產後抑鬱嘅開始
但如果你一早將運動帶入你嘅生活之中
首先你嘅懷孕期一定舒服過唔做運動嘅人
而且你保持身體上面嘅靈活 心態上亦會靈活輕鬆好多
即使偶爾冇人幫到你手 你都知道你自己係有能力可以自理
偶爾有人留意唔到你嘅身體上嘅改變
你唔會覺得有問題 因為你絕對有能力handle得到
如果有人主動行埋嚟幫你 讓座俾你
你會覺得感恩開心 而唔係覺得應該
亦都因為你冇live under the spotlight
Out of spotlight 自然就唔係一回事
即使BB出咗世好多嘢都唔識 邊學邊做
因為體能上你已經一早做好準備
所以心情會輕鬆好多
係照顧BB方面 你都相信自己有能力可以駕馭得到
產後修復以及回復正常嘅生活都比其他人順暢好多
唔會咁容易過分焦慮
即使情緒上需要宣洩 都有運動可以幫你
擁有自己嘅me time 流一身汗後
繼續返返自己崗位 面對挑戰
自然你嘅心理同生理都會健康好多
我總認為作為女性出去食每餐飯都應該帶夠錢
每一餐飯自己都食得起 俾得起 先至出席
如果被請客係因為你願意比對方請
而唔係你唔夠錢埋單
亦唔係覺得對方埋單係老馮
你隨時都可以為自己埋單甚至請埋對方
咁先至係真正嘅瀟灑自在
