《期待生病的少年時代》
病，是否利多於弊？
仲記得小學時為咗唔返學，有時候我會扮病，出門時候話哎呀，個頭好熱啊，我係咪發燒啊？然後阿媽就用佢精確嘅手背探熱器摸摸額頭，同自己講，無發燒喎！咁的確係唔熱嘅，最後死死氣咁返學。
病，係細個返學時的確係一種期待，病就好似一個免死金牌咁，唔駛做功課，唔駛返學，訓係度有人照顧，仲可以睇足一日教育電視，確實係利多於弊，反正小朋友康復能力強，病？怕什麼？
仲記得沙士當年，夠膽死同同學一齊唱K，行街，肺炎怕什麼，家陣諗返起真係有少少天真同傻。
成年之後面對社會，病？唔好玩啦，野要照做，個客係你嘅，客唔會因為你病而體諒你，將你呢一日病嘅時間當無事發生，好少少嘅會同你講，咁你休息吓，好返之後記得趕返個期，唔好甩喎；差少少嘅客會直接同你講，理得你死定病，我幾時要你同我死掂佢。
到個陣我終於明白咩叫，得閒死唔得閒病。
今日你病，如果你自己住的話，就要頂住發燒同唔舒服係屋企休養，你唔返工就證明你真係好病，有幾多香港人唔病到出唔到門口都會照返工，請一日假，會扣錢喎，你病得多，同事都會對你有怨言，特別係有時你病撞正成堆野等住做，無人會可憐你。
一個人係屋企，你已經唔會再有阿媽照顧你，女朋友同老婆都有自己工要返，最多返工前後買野比你食，餵你食藥，但你一日係屋企可以做乜？Netflix and Chill？無可能啦，食完藥有野做就WFH，無野做就訓吓啦。
有時唔到自己唔認老，當年你可以夜晚飲完酒唱通宵，食完早餐再去踢波游水，今日？你夜少少訓第二日都好似無咗三魂七魄咁，抵抗力同新陳代謝都無得同以前比。
細細個阿媽叫你食勁難食嘅魚油丸時，你幾難受先吞到，今日有邊個成年人無返少少補充品看門口？睇完成份同功效之後每日自動自覺去食，等自己無咁易病，因為你知道今日病，絕對係弊多於利。
想知一個人係咪開始老，好簡單，打開你嘅Social Media，年輕人會放嘅係去劈酒，今日不醉無歸，去食放題自助餐，食到回本先至停；而當你發現你睇到身邊嘅朋友突然注重健康，今日食沙律同麥皮放上網晒健康，去Gym同行山鍛鍊身體，以及有朋友發現自己三高、脂肪肝或者糖尿病等等時，你就知道你唔再年輕了。
最怕病，最怕肺炎嘅，我諗一定係我哋呢班正當盛年，但外強中乾嘅成年人，一諗到要隔離十四日，然後仲要醫病，先唔講醫療費用，你會好擔心你仲Keep唔Keep到份工，你好返之後，身邊同事同客人會用咩眼光望住你，信用卡點交好，供樓同家用又點算好？
成年人嘅世界，就係咁現實，病無咗當年嘅免死金牌，曾經你覺得如常生活已經算好健康，今日，你如常生活已經算唔健康了。
朋友們，多做運動，作息定時，今日唔養生，將來養醫生，講出嚟都覺得自己老，好似阿媽輩嘅叮囑，但今日無奈地要接受呢套，或者將來我哋都會同下一代講返同一番老套說話，望住佢哋揮霍健康，露出一個羨慕嘅表情。
－－－－－－－－－－－－－－－－－－－
《弊傢伙，我女朋友有咗》經已上架，有興趣的朋友歡迎點擊下列連結購買。
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：�https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
阿媽有咗第二個netflix 在 #阿媽有咗第二個- YouTube 的推薦與評價
姜濤現身戲院《阿媽有咗第二個》突破千萬票房／姜濤外賣打工的茶餐廳成打卡點. Pui Shan Studio. 1K views•11 months ago · 10:40 · 阿媽有咗第二個| 劇透影評| 三位 ... ... <看更多>