【有女睇波能力值加學乘🤔🤔】
版主讀書嘅時候都已經玩運動，都曾經渴望過會有Fans幫自己打氣。到踢波之後都希望另一半黎支持。咁到底係咪有能力加乘🤣明明一個人去就100%有另一半睇就能力再加到200%，好似啲online game抽到靚裝備，一落場就信心大增。
男士想另一半睇波 - 虛榮感
正如買左架靚車，都想車條女出去晒命。呢個道理理論上係成立。踢波除左講技術體力之外，心理因素都係一個好重要嘅問題。因為男人想藉著足球，去展現佢地嘅魅力。而當要show off，都唔會企喺度任對手魚肉。可能平時踢得Hea，跑動一定比平時多。當射入嘅時候，就算另一半識波定唔識波都會覺得有型。就係呢份虛榮感，絕對可以喺另一半面前J足一個星期。呢個情況不論岩岩拍拖定結咗婚。唔多唔少心理表現比一般情況下更好。
帶另一半睇波嘅好處
✅心理能力值加乘
✅有人照顧埋飲水食煙
✅帶佢見下你嘅波友，等佢下次容易申請下一次permit
✅當陪左另一半，少啲機會被投訴
✅等佢出去呼吸下空氣，好過行商場唔見錢
✅比佢了解到你嘅興趣，增加溝通
當另一半同你去踢波，細心嘅你當然想佢做你長期Fans，就算踢多幾場都冇投訴。以下有少少心得同大家分享。
1️⃣選擇合適球場
當然好多時唔到球員控制，但想冇黎睇波，你都唔想佢企足兩個鐘，所以必須要有看台，最好係仿草。因為真草會容易有蚊蟲。另外踩完草會入沙，對於有潔癖嘅女士黎講係的確難搞。例如蒲崗村、青衣東北、大埔廣福公園都係帶女睇波唔錯嘅選擇，附近又有啲野食下。
2️⃣飲品、遮、褸不可少
帶得女睇波，一定要佢睇得舒服。先至有下次。正如港女去High tea，個場唔靚坐得唔舒服，服務又差就唔會有下次。所以一定要安排好。買一支佢岩嘅飲品，得佢幫你打氣嗌到口乾嘅時候都可以潤下喉。特別呢期又濕又凍，一件保暖嘅褸得佢唔使吹風吹到冷親。佢冷親咪又係要你照顧佢🤣特別有啲女士鐘意著裙著短褲，呢件褸嘅作用就唔使比隊友眼望望。又唔會令到大家尷尬。另外春啲濕度高仲會落住毛毛細雨。一把遮保證到佢唔會淋濕嘅同時，帶多個膠袋比佢墊住睇波就滿分💯。夏天蚊蟲多就帶埋蚊怕水。仲有風扇仔👍🏻基本上做足呢啲就好多問題都解決得七七八八，最後唔少得一個叉電嘅尿袋，特佢覺得悶打機玩電話都保持足夠電力。
3️⃣盡早出門
帶女去睇波最忌趕住出門口，因為女仔要化妝，快則15分鐘，慢則1個鐘都出唔到門口。同埋化緊妝嘅女人係絕對唔催得。呢個只限早波，最好就輕鬆食個飯，令佢保持心境愉快。食完飯咪出球場就岩岩好。所以要預計多啲時間比佢。
曾經版主仲係單身狗嘅時候喺看台睇緊波，同隊友啲女友太太團傾下計，問點解睇波好天晒落雨淋都黎睇佢地踢波。佢地話雖然未必好識波，只係見到個22個男人追住個波唔知為乜。但有時場波入肉嘅時候係幾好睇，見到男
啲男人為左贏波咁緊張。都係一種樂趣。前提唔止要有個女朋友，仲要唔怕晒唔怕淋雨嘅女友，就等於肯陪你捱M記嘅女友，一樣咁難搵。所以要好好珍惜去睇你踢波嘅人。即使實際上冇加乘。但因為佢黎睇波。所以心理上都會開心嘅，enjoy 🤣
#有女睇波能力值加100
青衣 公園 狗 在 Tsing Yi 青衣- 康文署於青衣新增「寵物共享公園」... - Facebook 的推薦與評價
康文署於青衣新增「寵物共享公園」 康文署由2021年2月6日（星期六）起，翠怡花園太興至工廠區南橋底一段海濱公園*，將改為「寵物共享公園」，開放予市民攜同寵物進入 ... ... <看更多>