《香港本來唔係一個無聊嘅小島》陳心遙
《信報》2017年4月5日《視線所及》專欄
喺網上成日睇到一啲報道，專訪香港各區一啲工藝嘅師傅，不約而同都表示行業正瀕臨絕種嘅危機。
由修理鐘錶、製作霓虹光管、紙紮、整遮、木雕、裁剪旗袍等等等等，仲有排數。種種曾經喺香港引以為傲嘅工藝，通通落得失傳嘅下場。點解？師傅多數會話後生仔怕辛苦，唔願意入行。但真係一句賴咗落青少年度就得？
第一，不如我睇下佢哋個舖交緊幾錢租？個地方會唔會好似「棚仔」咁俾人喉住愛嚟「活化」？第二，究竟有幾多人知道香港有啲咩工藝，教育除咗中英數國情《基本法》同操TSA之外，有冇令學生認識多啲香港傳統歷史文化呢？
讀文化研究應該知道，要了解自己，其中一個有效方法係去了解人哋。去過日本嘅朋友應該有多啲體會。其實日本經濟好壞，年輕人不見得特別崇拜自己嘅傳統文化，但係人哋個氛圍同策略就係可以令到自己嘅工藝更有可能流傳落去。
有個訪問一個香港紙紮大王，佢話自己咁多年都冇升過級：「佬級」，應該都係一個紙紮佬。其實日本工藝一樣面臨失傳嘅危機，不過幸好「職人文化」尚存，各種師傅嘅社會地位崇高，收入再冇保障應該都三餐無憂、有瓦遮頭。喺日本，每個地方都有自己引以為傲嘅名勝同技藝，喺竹原市，有一座專為「日本威士忌之父」竹鶴政孝而設嘅博物館，仲曾經有電視劇翻拍佢嘅事跡。人哋先唔會理遊客或者世人係咪個個都對釀酒有興趣，佢覺得自豪嘅，就會世世代代表揚佢。相反，就算聲望如李小龍，到目前都未能夠有一座博物館，我真係好唔明，呢20年香港多咗咁多座豪宅，咁多個坐鎮一模一樣連鎖店嘅商場，點解都容不下一個幾千呎單位咁上下size嘅李小龍館？真係土地問題？供求問題？
喺日本打開電視，係一個三味線演奏嘅節目，一個三味線老師傅同佢個仔一齊演奏，應該收視都係麻麻，但人哋冇一台獨大，可以有空間播放關於文化嘅節目。喺機場見到一個展覽櫃，有一個全用和菓子製作，傳統日本雅樂表演嘅跳舞公仔「蘭陵王」，原來係兩個八十後嘅職人所造嘅。人哋傾盡全力保存所有歷史建築，成條江戶時代嘅商業街變咗一個景點。香港啱啱要拆毁90年歷史嘅佑寧堂；地政署每日幫手拆毁香港獨步全球嘅景觀——「違規」嘅霓虹光管。一切有因有果唔係無緣無故。最後想回應台北市長柯P一句：「對唔住，香港，本來真係唔係一個無聊嘅小島，本來。」
#香港本來唔係一個無聊嘅小島 #手工藝 #霓虹光管 #紙紮 #旗袍 #棚仔 #活化 #職人文化 #竹原 #日本威士忌 #竹鶴政孝 #李小龍 #李小龍館 #三味線 #蘭陵王 #台北市長 #柯P #柯文哲 #信報 #陳心遙
