Nike Magistax Proximo Street IC，高筒嘅平底足球鞋。 2015年，Nike推出咗兩對高筒波boot，一對係Mercurialx proximo，另外一對就係Magistax Proximo，一對以速度靈活見稱，一對就係以傳控為主題。一開始時，Magistax出咗兩隻色，一對係平實d嘅黑色，另外一對就係鮮艷嘅橙色，佢地用嘅料唔同，黑色就用上牛仔皮嘅皮版，橙色就用上有啲似真草版本嘅纖維皮。
作為Nike上年度嘅街場作品，今日小編同大家拎翻呢對嘅牛仔皮版出嚟講，話說喱對鞋已經成為絕版，因為之後所出嘅Magistax Proximo已經無皮版，反而係轉晒做纖維皮版。
Magistax係用上軟熟嘅牛仔皮做鞋嘅表面，牛仔皮同內膽中間仲有一塊網状嘅質料，令牛仔皮呈Magista經典嘅網狀表皮。Magistax Proximo鞋頭位置用上麇皮，相信係為咗加強鞋頭位置嘅摩擦力，令波飛行得更“西”吧。
鞋身方面繼續用上高筒鞋獨有嘅襪筒設計，俾人著落去感覺如著襪咁，令足部緊貼足球鞋。Magistax Proximo繼續用上貴版特有嘅ACC技術，令鞋可應付唔同嘅天氣。鞋底方面用上小編最愛嘅Lunanlon，俾球員晌硬地上緩震。
小編拎Magistax Proximo玩咗幾場波，又踢咗幾場比賽。由低筒轉去著高筒的確需要時間適應，感覺上有點笨拙，不及低筒般靈活。
Magistax Proximo球感唔錯，可以輕鬆痴下高飛過來的皮球，傳控球發揮出色，輕易命中目標。斬波上需要時間適應，畢竟鞋底較厚，要時間去做到“掘得夠深”嘅感覺。
於射門同扭波上，Magistax Proximo顯得笨拙，靈活性較低，扭波感覺唔暢順，但係鞋底抓地力一流，轉向上發揮不俗。射門上也需要適應，感覺有啲似著住對高筒鞋射波咁，腳面射波要時候先可以ban到啲飄波，始終Magistax Proximo皮版塊牛仔皮較厚，腳與皮嘅融合係需時；腳內擋射門上，發揮則很好，小編估計係鞋底塊厚膠較硬，加上塊膠制作咗特有嘅凹凸紋，令皮球容易食得應棍且夠西，可以輕鬆做到高水準嘅盪射。
受惠於鞋底嘅Lunanlon物料，Magistax Proximo緩震層面發揮頂級，腳底於踢球後感覺沒有以往的疲累。
不過，Magistax Proximo有個位唔好，小編就同過都著過喱對鞋嘅巴打傾過吓計，發覺Magistax Proximo嘅鞋踭刮腳問題係存在，而且係需要一段時間先叫做好啲；不過我地講緊第一代，唔知之後出嘅鞋有無改善到喇。
Magistax Proximo係一對玩傳控嘅球鞋，適合晌街場做串連同分波嘅你，佢用上牛仔皮，設計保護性也很強，這也很適合做後衛嘅你。售價上佢正價要$1199，各位唔想咁貴買就不妨買啲舊款嘅，例如前排小編喱對皮版就晌nike outlet賣過$7XX。
如果大家都係覺得仲係貴，又想要有皮版嘅感覺，大家可以留意Magistax Finale，喱對鞋同Proximo分別不大，只不過係無高筒同ACC，但係感覺就同樣暢快！
#nikemagistax #magistax #magistaxproximo #magista
#高筒波boot #高筒足球鞋 #五人足球 #七人足球 #石地場 #室內場 #足球鞋實測
