關於 magistax ，我們在網路上蒐集到這些相關的討論、資訊與評價

【Puma袋鼠皮平底波Boot：Puma King Pro IT 實測】
.
今個星期，阿靴會同大家講實測Puma旗下嘅袋鼠皮平底波Boot。Puma King 於2019年推出重新版本，頂級版本叫King Platinum，同時佢亦推出咗平底版本，可惜頂級版本只有King Pro，用料會較King Platinum遜色。雖然如此，King Pro仍然用上袋鼠皮以及襪套設計，加上定價於袋鼠皮波Boot上屬於較低，因此成為King Pro IT嘅賣點。至於King Pro IT發揮又是如何？今日阿靴會同大家詳細講講。
.
King Pro IT 鞋頭及鞋身均用上袋鼠皮質料，而袋鼠皮質料內層亦有一層凹凸質料，目的期望增強觸球球感，設計令阿靴想起當年嘅Magistax Finale IC用上嘅牛仔皮配以內裡嘅凹凸紋理。此外，King Pro IT用上無鞋舌襪套設計，期望俾到大家更貼腳嘅感覺。於避震層面上，King Pro IT亦配置緩震膠，期望減低足部於石地場上所承受嘅壓力。
.
於整個實測過程中，阿靴認為King Pro IT需要較長時間開鞋，畢竟波Boot襪套位置彈性較欠奉，而且鞋型較修腳，穿著初時腳掌兩邊也會有點痛，不過於第三次的實測，痛楚開始沒有，而且King Pro IT逐漸與腳掌融入，亦感受到袋鼠皮帶來嘅傳統控球質感。於開鞋後，阿靴相當喜歡波Boot嘅袋鼠皮質感，加上內裡嘅凹凸紋設計，King Pro IT嘅控球質感屬於理想，可以較輕鬆將皮球控下。
.
長短傳的發揮屬於中上。短傳上，雖然袋鼠皮質料能夠帶來較好嘅球感，不過King Pro IT會較修腳而且質料有一定厚度，短傳感覺會略欠暢順，但皮球球度屬於穩定。至於長傳上，因為波Boot較包腳，力量感會較充裕，此外，受惠於袋鼠皮革，配以內裡嘅凹凸紋理，於開鞋後長傳質感相當不錯，畢竟鞋面用料提升到長傳的距離感。
.
射門上係King Pro IT有驚喜嘅位置，較修腳嘅設計加上波Boot有一定重量，King Pro IT富力量感，可以較容易食得應皮球。腳內檔射門上，因為袋鼠皮質料配以凹凸紋理帶來更強嘅摩擦力，再加上鞋頭位置嘅麂皮質料，King Pro IT射門嘅弧度會較明顯，也可以較輕鬆射去期望嘅位置。
.
盤扭係King Pro IT較弱嘅位置，較硬身嘅鞋身質料，以及較緊嘅襪套大大減低了盤扭嘅靈活度，此外，King Pro IT嘅鞋口位置做得較為低，亦因此，阿靴覺得佢嘅Lockdown會較弱。不過，阿靴幾滿意King Pro IT帶來嘅緩震，實測期間腳底並唔會話痛。
.
整體嚟講，阿靴對於King Pro IT有少許失望，阿靴期望袋鼠皮波Boot能夠為大家帶來舒適嘅體驗，不過可惜嘅係King Pro IT襪套質料太緊，大大減低初時時穿著的舒適度。但好彩嘅係，於數次實測後，King Pro IT變得無咁緊，而且質料亦變軟，阿靴先慢慢享受到袋鼠皮波Boot嘅質素。
.
於尺碼上，阿靴認為波Boot無偏大或者偏細，建議大家選擇正常尺碼，至於鞋型上，阿靴會認為中至窄腳嘅波友會較為合適。
.
Puma King Pro IT 實測報告：
盤球：●●◐
控球：●●●●
短傳：●●●
長傳：●●●◐
射門：●●●●
靈活：●●◐
避震：●●●◐
.
感謝 HKGBALLBOOT 提供嘅波Boot
感謝 AXEYSPORT 提供嘅外套
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas X Ghosted.1 Indoor: https://youtu.be/LGFc_QJVnQ0
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM

新年又到，《屎波裝備多》祝大家遲來的雞年進步，身體健康，長踢長有！
農曆新年嘅來臨，小編當然要為大家送上新一段嘅波Boot實測啦。
今次同大家介紹嘅係Nike Magistax Finale II IC！

Nike Magistax Finale II IC 實測報告：
盤球：●●●
控球：●●●●
短傳：●●●●
長傳：●●●◐
射門：●●●
靈活：●●●
避震：●●●●●

#香港波Boot實測 #足球鞋實測 #nikemagistax #magistaxfinaleii #平底足球鞋 #五人足球 #石地波Boot #屎波裝備多 #感謝好友呀卡無私協助 #趕得切新年出片

講到小編暫時最喜歡嘅平底鞋，小編唔難諗，會答你係Magistax Finale。

Magistax Finale同先前介紹嘅Magistax Proximo係好似，只不過係少咗個襪筒。小編就偏偏唔係好鍾意襪筒，雖然佢感覺係保護多咗足踝，但係佢反而減低咗對腳嘅靈活性，感覺無以往踢波咁爽同順。Magistax Finale晌室內場係幾受歡迎，連葡萄牙球王Richardinho都係著喱對踢五人歐國盃。講到好犀利咁，就等小編同大家介紹喱對愛鞋。

Magistax finale 鞋面係主要由三層組成，最外層為牛仔皮，中層則為Magista經典嘅網狀質料，令球鞋表皮呈微微嘅網狀凹凸，加強鞋面嘅摩擦力同球感，最内層則為一層布料，給予腳與鞋一種舒適貼服嘅感覺。

Magistax Finale 嘅後半身同proximo係好唔同，佢用上織布料，織布係有條理咁由鞋嘅後半身包埋個鞋踭位。配以鞋带，球鞋可以牢牢的鎖住足踝同時不乏舒適性，令球鞋可以緊隨足部嘅移動並舒服地發揮。

鞋舌上，Magistax Finale用上膠質嘅凹凸材料用晌表皮上，令皮球接觸到鞋帶位時仍然保留到一定嘅摩擦力同球感。

鞋底方面，佢用上lunarlon，啫係nike常見嘅跑鞋底，給予優質嘅避震，話說最近nike出咗對最貴嘅低筒平底boot叫Tiempox，正正都係用喱個鞋底。另外，鞋頭嘅膠位係呈凹凸嘅斜紋，相信可以加強球鞋”chok西”嘅能力。

小編大部份時間玩波同比賽都會著Magistax Finale。佢最令小編深刻嘅係佢提供嘅球感同避震。

先講傳控球，短傳長傳發揮理想，輕易將皮球傳住目的地，Magistax Finale雖然鞋底感覺有啲厚 但係就完住唔會影響到小編斬波嘅質素。控球上，受惠於牛仔皮同網狀層嘅設計，皮球可以輕鬆控下，唔難做到first touch控高波去自己想去嘅位置。

避震上，小編認為係暫時晌香港市面上最優秀嘅一款球鞋（唔計日產嘅專業版，同某啲小眾牌子，因為香港揾唔到）。晌五人同七人喱啲講求腳底搓波嘅足球項目面，避震好嘅鞋顯得非常重要，避震全面嘅鞋可以令自己腿部於比賽中感覺舒適，同時可以減少傷患。小編著magistax finale踢波時，於跑動急停嘅時候腳板唔會食晒啲力 ，因此踢波後個腳底係唔會點痛同累。

射門上Magistax唔及Mercurialx同Hypervenomx咁貼腳，所以射啲波相對無咁恆，但係只要腳面食得應同射得啱位，都唔難ban個靚波去龍門。至於腳內擋嘅射門，受惠於鞋底個塊膠同佢周邊嘅斜紋，chok西效果俾想象中好，對於喜歡射西波嘅你應該會幾享受。

盤扭上基於Magistax Finale嘅軟熟牛仔皮同貼腳型鞋身，扭波唔會出現“唔聽洗”或者“推甩腳”嘅情況，且鞋底抓地力不俗，盤扭發揮屬中上。

總括嚟講，小編認為喱對鞋適合踢中場分波hold波，或者後防多做攔截同傳送嘅你。Magistax Finale晌香港唔難揾到，平起上嚟三百尾四百中就入到手；雖然Magistax Finale無其他nike嘅鞋外表咁有型同輕巧，但係論發揮，小編絕對認為喱對係性價比最好嘅一對平底足球鞋。

#magistax #magistaxfinale #magista平底 #nikemagista #magista #波boot #實測 #足球鞋 #石地場 #室內足球 #futsal #足球裝備

Nike Magistax Finale II IC 實測報告：
盤球：●●●
控球：●●●●
短傳：●●●●
長傳：●●●½
射門：●●●
靈活：●●●
避震：●●●●●

「屎波裝備多」
香港足球鞋實測平台
專頁: https://www.facebook.com/hkfootballreview/
IG: hkfootballreview