窮生啲野最好就係經常可以重睇，道理其實好易明，幾招可以走天下。對於沽港元，換美金的影響，淺談拆息，要做金融刺客，要上一上金融通識課。
\\節錄自經濟日報
港元拆息繼上日全線上升後，今日除了十二個月外，其他各期拆息持續走高。對利率最敏感的港元隔夜HIBOR上漲77個基點至1.96714%，為7月9日以來最高。與按揭利率相關的一個月拆息亦升0.12厘至2.26286厘，比美息高出近7個基點，重現倒掛。三個月拆息亦升至2.38375厘，高於同期美息約22個基點，六個月和十二個月拆息分別升至2.38536厘和2.41375厘。
港滙在7.8392-7.8432之間上落，最新在7.842兌1美元偏軟。\\
近日香港政治局勢緊張，昨天（6月12日）因為要阻止逃犯條例修定的二讀辯論，大批民眾包圍立法會，成功令會議壓後。運動中窮生在家中睇新聞見到（真係係家中睇新聞見到？）大批人士受傷，當中很多是學生以及婦孺，所以「有人」就覺得既然大家擅長的技能都不同，不如各有各做，做得幾多得幾多啦！所以有一說開始就基於對香港經濟前景的不信任，呼籲大家沽港元，調資產到海外之類很多方法。所以人多口雜，窮生又希望以自己所知所學解釋清楚當中概念，了解完之後，做唔做，如何做，自己決定。
什麼是拆息？
－－－－－－－－－－－－－－－－－－－－－－－
香港銀行同業拆息，簡稱HIBOR。簡單講就係香港銀行與銀行之間互相借錢既息率，銀行同同業借錢，利息當然較平！所以佢地如果有需要，就會借黎作為各類型你係廣告經常見到既服務，例如按揭、信用卡、私人貸款或者係中小企貸款等等。銀行做借錢生意，佢主要有兩個資金來源，一就係你同我既存款二就係同其他銀行借佢地d客既存款，而HIBOR就係當佢地用第二個資金來源果陣要花費既成本。
沽港元與抽高拆息的關係
－－－－－－－－－－－－－－－－－－－－－－－
網上有人呼籲以沽港元去衝擊聯滙制度，呢樣野有少少係由1跳到10，可能大家一時間未係好睇得明，我想拆解少少概念。因為我唔同意號召沽港元可以衝擊聯滙制度，但係沽港元係可以透過抽高拆息，影響香港經濟的正常運作。
上段講到拆息係銀行放數既成本之一，咁即係話，如果拆息抽高，銀行成本增，一係佢就將成轉架消費者，一係佢自己食左條數，而現實多數當然係兩樣都有d，好簡單既做生意概念，唔多解釋。咁代表左抽高拆息，日後你買樓申請按揭會貴左，做生意要資金週轉會貴左，信用卡都難再有咁多優惠。信用卡事少，買樓條數計唔掂就大件事，所以點解d人成日會話加息影響樓市就係咁解。
當大家都沽港元，買入其他國家的貨幣到一個水平，因為大家都唔要港紙，港紙兌美金到左7.85，金管局就要接港元，金管局接返黎d港元係唔會放返出黎，以保持個匯價，咁市面流通既港紙就變少，咁流動既錢少左，息就自然抽高。正常黎講，息多左，d人又會覺得息口吸引而返返黎，聯滙制度個運作就係咁。
香港經濟的基本因素改變
－－－－－－－－－－－－－－－－－－－－－－－
一般黎講，息高左，錢就會返黎。香港行左好多年都係咁。但係如果經濟情況作出左基本因素改變，例如美國決定取消《香港關係法》，香港再難以成為自由經濟體。咁大家就會對香港既錢同資產失去信心，咁沽港元就唔係講既你鍾唔鍾意呢間銀行，又或者係愛唔愛香港既問題，而係現實問題。而呢個動作，你會唔會等出左事先做呢？古語有云：契弟走得摩。
香港的樓因為資金泛濫多年而受惠長升，原因係香港有自由經濟優勢，資金出入安全而方便，呢d係令到香港樓有溢價既主要原因，隔條河已經唔係呢個價，而隔離點解都貴左咁多？因為近香港，雙方都有協同效應。只要基本因素不變，香港樓實難大跌，大前題係基本因素不變。
我之前亦有撰文提到，我不相信香港的聯匯制度會因為你沽港元而崩潰，但銀行系統卻係比大家想像中脆弱。渣打、匯豐同恆生係6月12日前公布體諒員工，6月12日可彈性上班，此舉有可能減輕了民眾對他們的反感，而香港3間發鈔銀行，似乎有一家沒有這樣做，我擔心有人因此而向這間銀行作出行動。因為如果大家集中火力向同一家銀行提取美元，就算係港元，任何一家銀行都難以抵擋。窮太在這間銀行存有存款，我也很擔心她的資產受到影響，我今早已經提醒她要先把資金調到其他地方，以及我希望呼籲大家，不要因為對個別銀行太反感而向中資銀行擠提，請為香港的大局著想啊！
原文：
http://www.poorlhk.com/2019/06/13/沽港元與抽高拆息的關係，對社會有什麼影響？/
沽港元以外的可行投資方案：
https://www.facebook.com/…/a.115196542235…/662698380818209/…
協同效應通識 在 塵文吹營銷通識- 品牌玩聯乘，無非都係想製造「協同效應 ... 的推薦與評價
品牌玩聯乘，無非都係想製造「協同效應」(Synergy)，為消費者帶來新鮮感，刺激銷售。 如果彼此咁高咁大，粉絲又不太重疊的話， ... 塵文吹營銷通識, profile picture ... ... <看更多>