關於 旺角 足球鞋 ，我們在網路上蒐集到這些相關的討論、資訊與評價

上回提到小編於旺角睇下波BOOT，遇到唔少好選擇，仲响興發遇到對Adidas X15.1 橙黃配粉紅嘅貴版BOOT，事不宜遲，小編已經著咗對鞋，响綠茵嘅球場上進行實測。今日，小編响度為大家送上第一手嘅資訊。

Adidas X系列話說係由舊時Adidas足球旗下嘅Predator，F50，Nitrocharger同11Pro重新於市場整理，簡單的變為X同ACE系列，以及之後加入嘅Messi系列同復古味濃嘅Gloro。X係要製造混亂，ACE就係要控制比賽。今日對X15.1有唔少球星着過，包括巴爾，蘇亞雷斯同馬些路。小編作為馬些路嘅頭號粉絲，就當然睇中橙黃色呢對佢經常著嘅顏色啦！

X15.1用上三個特別嘅科技，分別係XSkin，XCage同XClaw。先講XSkin，佢嘅表皮係由呈網狀嘅纖維皮組成，皮上面仲有突出嘅一點點，話可以加強球感咁話。鞋嘅內層係塊薄薄嘅海棉，加強鞋嘅貼腳程度。XSkin更加配上了Techfit嘅鞋筒，令人有種著襪嘅感覺，令鞋同人更加合為一體。

鞋舌上X15.1係連住個Techfit襪筒同鞋頭，令鞋舌唔會輕易左右移動，此外，佢舌上嘅皮同樣有突出一點點嘅設計，令球鞋所有位置保持著一樣的質感。XSkin嘅科技仲包括埋Non-Stop Grip (NSG), 啫係波Boot嘅發揮唔會因為天氣而受到影響.

Xcage係X15.1嘅另外一個科技。佢嘅位置係粉紅色漸變果個位置，佢呢個設計係令波BOOT綁上鞋帶後，令鞋身兩邊更貼近腳掌，貫徹番X15.1嘅設計宗旨：貼腳得嚟舒服。

Xclaw係講緊鞋釘嘅設計，X15.1嘅鞋釘嘅輕巧同時抓地力強，鞋釘嘅形狀更有利球員轉向咁話。此外，X15.1嘅鞋釘更加係波Boot界創新嘅設計，佢係AG/FG，姐係話鞋釘嘅設計係適合晒真草同仿草咁話。

小編拎咗對X15.1响真草場踢咗場波，最令小編深刻嘅係X15.1嘅貼腳，佢鞋籠嘅薄海棉，加上Xcage嘅科技令鞋緊緊貼住對腳，個種感覺仲要係幾舒服咁嘅。

表現方面，先講射門，Xskin嘅最底層係塊薄海棉，佢令球員穿著舒服，但係亦都係咁，令到鞋面變厚咗啲啲，影響到腳面Ban波嘅力度，啫係個波變相食得無咁應，呢方面比Adi最大嘅競爭對手Nike嘅Mecurial Vapor有所失色。至於腳內檔嘅射門就唔大影響，鞋身一點點突出嘅設計，令腳內檔射門唔難射出「香蕉球」。

控球方面，受惠於Xskin內層嘅薄海綿，佢為控球卸力，令皮球可以輕易控下，無論地波或高波，只要時間配合得宜，唔難做好First Touch，控去自己期望嘅位置。對於一對速度型嘅Boot嚟講，呢一點係幾有驚喜。

傳球方面，地波鏗鏘有力，皮球輕易準繩咁傳去目的地；至於斬波類嘅長傳，小編就感覺麻麻，因為斬波好多時候係講球感，而小編係著開袋鼠皮嘅Boot，因此就比下去。X15.1嘅腳內側傳中就發揮中上，做啱個姿勢，一嘢轟落去，當然要轟啱位置啦，唔難於球場兩邊斬出急勁嘅平飛球。

抓地力方面，响真草球場上，釘唔難入晒草地，至於係唔係會抓得好啲，小編就的有保留。至於如果想食晒兩家茶飯咁著埋響仿草場上，小編認為X15.1只適合中至高質嘅仿真草，如果踢嘅係櫻桃街，九龍灣細仿草或者係中山紀念公園呢類低質仿草嘅話，純Ag或者Turf嘅波Boot則適合得多。

總括黎講，小編認為呢對係一對創新嘅進攻型波Boot，舒適貼腳係佢嘅優點，而且佢Size係適合亞洲人，小編對腳係啱啱好貼哂，所以有啲外國Boot評人就反而話佢唔啱自己腳形。小編認為X15.1絕對適合喜歡上腳進攻嘅你；此外，X15.1响保護性嚟講可以話眾速度型嘅Boot裡面最出眾嘅一對，所以眼見唔少閘位嘅球員都會著呢對Boot。

#adidasfootball #adidasx15.1 #adidasx #adidaschaos #x15.1 #真草足球鞋 #仿真草足球鞋 #adidas波boot #adidas足球鞋 #ag #fg #足球鞋實測 #波boot實測 #xskin #xcage #xclaw #nonstopgrip #adidas釘boot

九月份就到，又係球隊開咧嘅時候，學生哥又即將開學，近排簡直係買新boot嘅季節。小編今日就同大家晌八月尾嘅時候，睇吓附近有咩又平又靚嘅波boot買！講到明先，買性價比高嘅boot多數係買上年出嘅系列，要追新款嘅朋友，喱個post就未必幫到你喇。

小編今日主打嘅係旺角同觀塘。去旺角，就係貪佢多賣波boot嘅鋪頭，而且種類繁多。小編行晒成條波鞋街，又去吓adidas football. 又去下nike football, 又有new balance，興發同麥花臣後方嘅允記旗艦店。係晌新世紀moko嘅futbol trend無去到咁，因為有啲遠。至於觀塘，就係貪佢晌駱駝漆有成三間outlet，加上附近仲有啲賣平boot嘅地方。

先講旺角，adidas football係小編成日去嘅，ace16.1綠色已經開始減到去$1000附近，不過最吸引嘅係messi16.1銀藍色，竟然出咗無奈就跌咗去$999(多謝讀者Jimmy嘅資料提供😁)，喱對messi16.1先前一直好評如潮，喱個價位簡直入得過。

行多幾步去興發，最後4日，唉，佢陪伴住小編嘅成長，細過買波衫，小編一定走入去望幾眼。不過又老實講，呢間鋪啲人嘅態度認真麻麻地，大過嘅時候為咗唔想受佢氣，基本上係唔會入去買嘢。不過點都好，都叫有啲感情，入去兜個圈睇吓。貴版boot淨翻adidas同puma，全部$500，主要嘅係X15.1，messi 15.1，仲有一款puma evopower1.2，小編見多數係細size，啫係US7/7.5個啲，大啲size就要睇彩數喇。此外，興發仲有中價版嘅boot賣，價錢係晌$300樓下。小編就見同興發有啲感情，諗住今日買對X15.1 solar gold作回憶，問問先，又咁啱有我size喎，試完，買得，櫃枱check下先，不過無鞋袋嘅？老闆話無，算，喱個價唔同你嘈，明明X15.1有原裝鞋袋，不過大家要有定心理準備會係咁。(圖1,3)

再過去允記旗艦店，一系列X15.2 ct國家特別版做特價中，$369就買到落場級數嘅波boot。話說先前五人室內歐國盃就有球員著呢款，絕對係性價比強嘅一對鞋。選擇上，就有美國，巴西同墨西哥等選擇，小編就應該美國隊設計最有型，不過鞋身有白色嘅位置，驚污嘈嘅朋友就真係要諗一諗喇。(圖2)

去埋觀塘睇睇，喱排買boot就真係要買adidas。一排adi boot整齊嘅boot放在眼前，而且眼見size有唔少。$1000蚊價位嘅靚boot就有messi16.1銀藍色，ace16.1藍，X15.1全黑(心心眼)；$8XX嘅價位就有ace16.1綠色，x15.1。再低啲嘅價位就有messi15.1黑同綠。當然啦，adidas outlet不乏中價版(.2系列)或以下嘅boot，價錢都係$500樓下。(圖4,5)

好多人都以為觀塘淨係得駱駝漆outlet，話說晌觀塘地鐵站迴旋處附近，D4出口轉落去，有間叫the2008sports嘅鋪頭，不時都會有啲靚boot晌到。今日小編見到嘅係絕咗版嘅nike elastico pro iii，仲要有成三隻色，價錢都只不過去$399。小編就有個朋友情有獨鍾喱對elastico，相信喱間鋪頭會好幫到佢。(圖6)

今日就介紹住咁多先啦，如果各位波友又有啲賣boot平靚正嘅勝地，不妨話俾小編知，等我又去朝下聖先。

#買波boot #平靚正波boot #性價比高 #adidas足球鞋 #nike足球鞋 #adidasx #adidasmessi #nikeelasticopro #興發 #允記旗艦店 #adidasfootball #駱駝漆outlet #the2008sports