晚餐前菜是天婦羅炸蝦配蜜糖醬，一上碟，嗯，成件事錯L晒😊
先不說天婦羅點解變左做阿修羅炸蝦，個醬呢，變左做一杯滾油。成件事即刻變左東華籌款吳剛師傅飲滾油，大佬，我腦裡面即刻聽到東華首主題曲啊... 請問邊位天才小廚師咁聰明諗到用熱油沾炸蝦咁開心？ 同侍應講，佢望一望話唔好意思上錯左，於是佢換左另一碟... 凍嘅油俾我... 說好的蜜糖醬呢？！！！！
然後，我默默地扒開脆皮，淨係食晒啲蝦算數，唔通真係難為個侍應再換咩，算啦，多一事不如食舊屎。
主菜，牛排等足一個鐘，medium rare 等到變左做well done，好彩塊扒本身靚，就算俾廚師踐踏完都一樣入得口（但絕對不好食），薯條軟嘅、啲菇焗耐左變左紙板，仲衰過大檸樂啲鐵板扒餐。不過蕃茄非常好食、個黑椒汁也是一流，我建議呢間野不如以後主打賣蕃茄算啦...
兩口子去旅行，中伏會有、天氣不似預期都會有，但我從來緊記一點：唔好遷怒對方、唔好發脾氣。餐廳揀得唔好，佢自己已經非常唔好意思，間餐廳又唔係佢開，怪佢都冇用。好又一餐、唔好都係一餐，寧吃開眉屎，莫吃愁眉飯。兩個人在一起是最重要的，食咩其實無乜所謂，美食自然錦上添花，但劣食一樣刻骨銘心。起碼從此我們見到天婦羅炸蝦，都能會心一笑，這樣也是快樂的一個記憶。😂😂😂
#唔開名
#有緣自然會食到
#踩地雷也是需要緣份的
#呢間野都好出名架
#我估係大廚失手掛
#有情飲水飽
#依家仲要咁大杯油
#點飲都飽啦下話
#開開心心笑下又一日
#劣食界KOL 😆😆😆
