（長文，慎入）
尋日走咗去筲箕灣嗰邊玩，大家睇相都知啦。不過我係喺太安樓開始行，仲食咗早餐先出發。一來我唔慣空肚食早餐，二來太安樓嗰啲出名嘅牛雜我喺香港唔食得。
沿途當然見到好多有趣事物啦！我仲特登企喺度睇人哋拉腸粉添。呢啲都係美好嘅童年回憶，細個嘅時候基本上屋企附近橫街小巷，都會有一檔賣白粥豬腸粉。嗰陣時邊有交貨㗎，個個都係自己拉，冬天嘅時候蒸氣騰騰，又溫暖又熱鬧。當然拉腸粉嗰個嬸嬸隻手，我仲記得紅到變晒色，自己都覺得唔好意思。
由太安樓一路行過去筲箕灣，見到最多嘅就係藥材舖同埋啲賣老人健康用品嘅店舖，而奇怪地竟然連續三四個街口，都聞到一陣藥油味。另外，沿途嘅店舖，好多間所賣嘅食物都係我細個時候嘅美食。包括莎翁、合桃蛋糕。仲有好難得嘅金蓋牛奶同埋好古老嘅可樂招牌。
跟住就行到去街市！嘩，真係熱鬧，花呢花綠，藍天白雲嘅天氣下行露天街市，心情都特別正。買咗磅栗子， $20 ，佢仲幫我用機器剝埋殻剝埋衣，結果得返10安士！都應該算係一個好獨特嘅經驗！最開心係買到四個大大嘅神石榴，標價$60 ，佢收我$55咋。
去到工廠街，見到32號果幢大廈，真係有啲暈。唔知咩人住喺嗰度㗎呢，大騎樓唔在講，大門口嗰幅磚牆先至靚到絶。
跟住就冇乜特別啦。睇吓好古老嘅棉胎鋪同埋喺電車總站影咗幾幅相就去飲茶。係呀，冇去食乜嘢名物，因為排隊排到癲，是但搵間茶樓上去坐低，舒舒服服一盅兩件仲好啦。
呢啲舊區真係要得閒去行吓，搵返香港美麗嘅一面。同樣屋企嘅長者都要多啲去探下（疫情期間就打電話啦），先至知道原來自己童年現在一般可愛。
#何嘉麗callmegaga #何嘉麗 #出街玩
#筲箕灣 #太安樓 #東大街 #電車總站
#唔好問我點解喺香港唔食牛
