🙄你有冇試過：考試嘅時候，醒起筆記有嘅內容，但硬係醒唔起寫咗乜？
.
🙄你有冇試過：花好長時間，寫靚本筆記，考試嘅時候，心諗：「如果考試係Open Book嘅形式，咁就好啦！」
.
🙄你有冇試過：寫完/買完本筆記之後，長期放喺書櫃，只係刨過三兩次？
.
🙄你有冇試過：望住自己本筆記，自己問自己：「寫得咁靚咁完整，咁點解唔直接睇書？」
.
接下嚟，我會解釋你知3個問題：
.
（一）點解普遍學生都會沉迷筆記？
.
（二）當你沉迷筆記，你會有咩後果？
.
（三）唔寫筆記嘅話，你又應該點樣學習？
.
先旨聲明：沉迷筆記乃人之常情，千祈唔好斥責自己蠢。we are only human，執起再放下，係成長嘅必經階段，睇咗呢篇文，你係應該慶祝至啱！
.
👹點解普遍學生都會沉迷筆記？
.
👿具體化。當你買咗你依家揸住嘅呢一部手機，你會睇得到、摸得到、撳得到佢，因此你徹底知道自己擁有咗呢一部手機。但係……「知識」呢？你點先知道自己擁有咗「知識」？睇唔到、摸唔到、撳唔到，「知識」係抽象嘅。當你將知識寫落本筆記，而呢本筆記又係擁於你嘅時候，你就會妄想你已經擁有「知識」。但係諗深一層，其實你只係擁有筆記，未必擁有咗「知識」。
.
👿象徵性。學功夫練紥馬，練夠唔練夠，可以用時間量度，紥馬三個鐘，梗係堅過紥馬三分鐘。但係……溫書呢？點先叫溫得夠？更加貼地嘅問題係：老師叫我勤力溫書，我點至叫勤力？時間都證明唔到，因為溫書可以遊魂，繼而嘅對策，就係寫筆記。但係諗深一層，畀盡你寫嗰一次溫咗，翻睇嗰N次同一般溫書有咩分別？
.
👿儲物癖。自己嘅筆記寫得靚，可以靚到藝術品咁，好似啲小妹妹寫手帳，有時我都覺得幾可愛（小妹妹都可愛）。天皇嘅筆記更甚，封面設計靚到爆，尤其是當個天后仲要幾靚女嘅時候，間唔時望吓可以提神。有啲常規筆記寫住第X集，成個系列咁，若然少咗本，全套1至10集唯獨少咗本第5集，個心仲會唔舒服。但係諗深一層，你儲咗本嘢，唔代表你具備咗作者嘅能力。
.
👹當你沉迷筆記，你會有咩後果？
.
送一個好經典嘅故事畀你：
.
有個人，喺森林，想過河，於是佢開始收集物資，紥咗隻木筏出嚟，成功渡河，過咗對面岸。佢心諗：「呢架木筏，幫我渡過咗難關，非常有用，我一定要Keep住佢。」於是佢就將成架木筏，孭喺背脊，繼續上路，相當狼狽。
.
係咪好戇居？係啊！我地每一個人都曾經如此戇居過。筆記有用，於是我地唔肯放低佢，一本又一本孭曬喺背脊。
.
沉迷筆記嘅後果，就係佢會【拖慢你嘅學習進度】，初期你會有顯著嘅進步，但好快你會去到樽頸位，寫極筆記都係咁上吓，孭住架木筏，你想行得幾遠？
.
此外，沉迷筆記嘅另一個後果，就係你【誤以為自己識好多】，可以快速翻查知識，但考試嘅時候，無得翻查，等如射擊比賽唔畀帶鎗。
.
上述嘅故事，其實出自佛學，佛曰：「木筏非岸」就係咁嘅意思，你係想去對面岸，隻木筏只係你去對面岸嘅工具，你要將佢放低，先至真正上到岸。
.
查實筆記唔係無用，但有用之處不在儲，有用嘅係寫嘅過程。你可以疏理雜亂嘅知識，重新組織起嚟。記住你要【將知識input入大腦，唔係將知識input入書櫃】，否則考試嘅時候，唔通你打開本筆記偷睇？
.
👹唔寫筆記嘅話，你又應該點樣學習？
.
其實我係會寫筆記，正如上一段所講，筆記都有用，但有用嘅係寫嘅過程，而唔係儲嘅過程。所以，我會不斷寫筆記，唔會寫喺簿，而係寫喺紙張上面，方便我嚟手丟咗佢。（寫喺本簿太靚，邊會捨得丟吖！唔捨得丟嘅話，又點會肯再寫多N次吖！）
.
每學一樣嘢，都係一個累積嘅過程，總會有一個時刻，自覺累積得太多，好似屋企張書枱咁，一本本筆記攤响度，好似幫張枱冚被咁。去到呢個moment，就應該拎張紙出嚟寫筆記，疏理返啲知識，幫你個腦執枱。
.
寫完之後，過一排又學多咗嘢，呢個時刻你再回望呢張爛紙筆記，你會發現有啲內容你已經識咗，唔使睇都會知，咁你就可以用筆，劃走啲已知嘅內容，甚至撕走佢，逼自己「記」入腦，而唔係「寄」存喺書櫃。若然淨返好少內容唔識，你可以直頭丟咗成張爛臭紙，連埋你新學嘅內容，重新寫一張爛紙筆記。不斷進行呢個程序，丟！丟！丟！你越丟得多，就代表你越學得多。
.
💡學習有咩竅門？不妨乎兩招：
.
（一）重覆次數夠多，即係所謂洗腦嘅原理，電視劇主題曲每日都播，你無刻意背都會無端端識得唱。寫靚筆記，知識重整只有一次；寫爛紙筆記，知識不斷重整。
.
（二）夠深刻，刺激臂上腺素。寫靚筆記，隨時可以速查，整個過程太安全啦，唔記得就查返。但係「劃、撕、丟」就唔同，唔記得就無咗，下次又要再寫過，逼自己記得更深刻。正如實驗室老鼠學嘢，都係靠電擊，行錯就電你，行錯就電你，夠深刻。
.
杜氏數學：爛紙筆記學習法，一次過滿足你兩個願望。
.
盡信書不如無書。張三丰教張無忌武功嘅時候，每教一招就要佢忘記一招，當張無忌忘記曬嘅時候，佢就練成了。呢個係再另一個境界，潛意識嘅境界，我前幾個帖講「點先叫溫熟？」嘅時候講咗，我建議你去睇埋。
.
我喺留言區，分享多個故事：
.
記者訪問李小龍：「咩叫截拳道？」李小龍突然將枝mic拋畀個記者，個記者自動接住咗，李小龍回答：「這就是截拳道。」
.
若然你做數能夠去到呢個境界，本能反應就計咗條數，咁你就真係熟啦，詳情去睇返個帖。
.
😍坐言起行：
.
若然你本身已經寫咗本靚靚筆記，又或者已經儲咗一系列天皇筆記，我叫你丟，你都唔會捨得丟，所以你當佢地係教科書啦。若然你無寫開筆記嘅習慣，就直接拎本教科書出嚟。重新仔細睇一次，將至今唔識嘅嘢，寫喺張爛臭紙，記住【讀通咗嘅嘢，千祈唔好寫！】你嘅目標係將知識傳送入腦，如果本身已經喺個腦，寫嚟只會分散注意力。
.
若然內容太多，唔緊要，斬件做。逐啲逐啲寫，寫成點唔重要，重要嘅係寫嘅過程，你會不斷反問自己「點解？」疏理知識。
.
釣勝於魚，若然你要魚，去街市買囉，何必要去釣魚？因為你要嘅係享受釣魚嘅過程。同樣地，若然你要筆記，去書局買囉，何必要去寫？因為你要嘅係疏理知識嘅過程。
.
最後一個尖銳嘅問題，我唔講答案，你自己答自己：
.
「狀元寫筆記，成為咗狀元，咁買狀元筆記嘅人呢？」
.
嗯。
.
恭喜你睇曬呢2500字！我亦都恭喜自己終於寫到我想講好耐嘅嘢！
.
杜氏數學Online Course以及YouTube Channel嘅project已經settle好，我今次決定展開Instagram【數學外掛懶人包】（ https://www.instagram.com/dse_herman_to_math ）嘅project👍
.
😊理念係：幫年輕人花更少時間考好數學，應付過曬時嘅教育制度，跨過無謂嘅考試，留返更多時間發展人生，做自己真係中意做嘢事。
.
如果你認為我嘅內容幫到你，我懇請你分享畀你嘅好朋友💓分享去班group💓有感香港後生仔做人越嚟越艱難，我展開我嘅使命😊
渡河 問題 數學 在 離散數學: 渡河問題 的推薦與評價
A farmer has a ship, a chicken, a bag of rice, a dog. He need to take all of them cross the river. But, this ship is too small. ... <看更多>